டெல்லி :கனடா பிரதமர் மார்க் கார்னி தலைமையிலான லிபரல் கட்சி அரசு தற்போது சிறுபான்மை அரசாக செயல்பட்டு வரும் நிலையில், மக்களவையில் பெரும்பான்மை பலத்தை நோக்கி வேகமாக நகர்ந்து வருகிறது. சமீபத்தில் மேலும் ஒரு எம்பி கட்சி மாறியதால் இந்த நிலை ஏற்பட்டுள்ளது.நியூ டெமாக்ராட்ஸ் (NDP) கட்சியைச் சேர்ந்த எம்பி லோரி இட்லவுட் லிபரல் கட்சியில் இணைந்துள்ளார். இதன்மூலம் லிபரல் கட்சிக்கு மக்களவையில் மேலும் ஒரு இடம் கிடைத்துள்ளது.
இட்லவுட் தனது அறிக்கையில், “குடும்பம், சமூகம் மற்றும் ஆதரவாளர்களின் ஊக்கத்தால் இந்த முடிவை எடுத்தேன்” என்று தெரிவித்துள்ளார்.இதற்கு NDP இடைக்காலத் தலைவர் டான் டேவிஸ் கடும் அதிருப்தி தெரிவித்துள்ளார். “தேர்ந்தெடுக்கப்பட்டவர்கள் கட்சியை விட்டு வெளியேறி வேறு கட்சியில் இணைவது ஜனநாயகத்திற்கு எதிரானது. அவர்கள் தங்கள் மக்களிடம் மீண்டும் தேர்தலில் நிற்க வேண்டும்” என்று அவர் கூறியுள்ளார்.
லிபரல் கட்சி இட்லவுட்டை “மிகுந்த உற்சாகத்துடன் வரவேற்கிறோம்” என்று அறிவித்துள்ளது. இட்லவுட் 2021-இல் நுனாவுட் பகுதியில் இருந்து முதல்முறையாக எம்பியாக தேர்ந்தெடுக்கப்பட்டவர். ஜனவரி மாதத்தில் அவர் லிபரல்களுடன் இணைவது குறித்து பேசப்பட்டாலும், அப்போது தயாராக இல்லை என்று கூறியிருந்தார்.கார்னி தலைமையிலான லிபரல் கட்சி சிறுபான்மை அரசாக இருந்தாலும், கடந்த சில மாதங்களில் பல எம்பிகள் கட்சி மாறியுள்ளனர்.
முன்னாள் கன்சர்வேடிவ் எம்பிகளான மேட் ஜெனெராக்ஸ், கிறிஸ் டி’என்ட்ரிமாண்ட், மைக்கேல் மா ஆகியோர் லிபரல்களில் இணைந்துள்ளனர். இதனால் கார்னி அரசு பெரும்பான்மைக்கு மிக அருகில் வந்துள்ளது.இந்த வார இறுதியில் கார்னி மூன்று இடைத்தேர்தல்களை ஏப்ரல் 13-ஆம் தேதிக்கு அறிவித்துள்ளார். டொரான்டோவில் இரு தொகுதிகளும், மான்ட்ரியலில் ஒரு தொகுதியும் இடைத்தேர்தல் நடைபெறவுள்ளது.
இந்த மூன்று தொகுதிகளிலும் லிபரல்கள் வென்றால், இட்லவுட் உட்பட கட்சிக்கு 173 இடங்கள் கிடைக்கும். இதனால் கார்னி அரசு பெரும்பான்மை பலத்துடன் 3 ஆண்டுகள் ஆட்சி நடத்த முடியும்.ஒட்டுமொத்தமாக, கனடாவில் லிபரல் கட்சி வேகமாக வளர்ந்து வருகிறது. NDP கட்சி பலவீனமடைந்து வரும் நிலையில், கார்னி அரசு பெரும்பான்மைக்கு மிக அருகில் உள்ளது. இது கனடா அரசியலில் பெரிய மாற்றத்தை ஏற்படுத்தும் என்று எதிர்பார்க்கப்படுகிறது.