இந்தியா கூட்டணி 295க்கும் மேற்பட்ட இடங்களில் வெல்லும்.! கார்கே உறுதி.!

டெல்லி: இன்று டெல்லியில் உள்ள காங்கிரஸ் தலைவர் மல்லிகார்ஜுன கார்கே இல்லத்தில் இந்தியா (I.N.D.I.A) கூட்டணி கட்சிகளின் தலைவர்கள் கலந்துகொண்ட ஆலோசனை கூட்டம் நடைபெற்றது. இதில் இந்தியா (I.N.D.I.A) கூட்டணியில் இடம்பெற்றுள்ள காங்கிரஸ், திமுக, ஆம் ஆத்மி, சமாஜ்வாடி, ராஷ்டிரிய ஜனதா தளம் என பல்வேறு கட்சி தலைவர்கள்/பிரதிநிதிகள் கலந்துகொண்டனர்.

இந்த கூட்டத்தில், ராகுல் காந்தி, மல்லிகார்ஜுன கார்கே, சோனியா காந்தி, அரவிந்த் கெஜ்ரிவால், பக்வந்த் மன், சரத் பவார், அகிலேஷ் யாதவ், தேஜஸ்வி யாதவ் , பரூக் அப்துல்லா என பலர் கலந்து கொண்டனர். இந்த ஆலோசனை கூட்டம் பிற்பகல் 3 மணி அளவில் நடைபெற்றது.

இந்த ஆலோசனை கூட்டம் நிறைவுற்ற பிறகு, இந்தியா (I.N.D.I.A) கூட்டணி கட்சி தலைவர்கள் கூட்டாக செய்தியாளர்களை சந்தித்தனர். அப்போது காங்கிரஸ் தலைவர் செய்தியாளர்களிடம் பேசுகையில், மக்களவை தேர்தலை இந்தியா (I.N.D.I.A) கூட்டணி கட்சியினர் எதிர்கொண்ட விதம் பற்றி விவாதித்தோம். தேர்தல் பிந்தைய கருத்து கணிப்பு குறித்தும் நாங்கள் விவாதித்தோம் என்று குறிப்பிட்டார்.

மேலும், இந்தியா (I.N.D.I.A) கூட்டணி நாடளுமன்ற தேர்தல் முடிவில் 295 இடங்களுக்கு மேல் வெல்லும் என்று கூறினார். தேர்தல் கருத்து கணிப்பை வெளியிடும் அமைப்புகள் உண்மையை மக்களிடம் கூற வேண்டும் என்றும் கார்கே செய்தியாளர் சந்திப்பில் குறிப்பிட்டார்.