மருத்துவமனையிலும் உண்ணாவிரதத்தை தொடரும் திருவள்ளூர் எம்.பி. சசிகாந்த் செந்தில்.!

மத்திய அரசைக் கண்டித்து உண்ணாவிரதம் நடத்திவரும் சசிகாந்த் செந்திலின் உடல்நிலை பாதிக்கப்பட்டு திருவள்ளூர் அரசு மருத்துவமனையில் அனுமதிக்கப்பட்டுள்ள நிலையில் தனது போராட்டத்தை தொடர்கிறார்.

ByGowthamVerified account

1 Min Read

Published - 31 Aug 2025 at 11:36 IST

திருவள்ளூர் :திருவள்ளூர் காங்கிரஸ் எம்.பி. சசிகாந்த் செந்தில், மத்திய பாஜக அரசு தமிழக மாணவர்களுக்கான கல்வி நிதியை (சமக்ர சிக்ஷா அபியான் – SSA) வழங்காததைக் கண்டித்து, கடந்த ஆகஸ்ட் 29ம் தேதி தொடங்கிய காலவரையற்ற உண்ணாவிரதப் போராட்டத்தை மூன்றாவது நாளாக இன்றும் தொடர்கிறார்.

இந்தப் போராட்டம் திருவள்ளூர் மாவட்ட ஆட்சியர் அலுவலக வளாகத்தில் உள்ள மாவட்ட வளர்ச்சி ஒருங்கிணைப்பு மற்றும் கண்காணிப்புக் குழு அரங்கில் நடைபெற்றது. ஆனால், உடல்நலக் குறைவு காரணமாக ஆகஸ்ட் 30, 2025 அன்று அவர் திருவள்ளூர் அரசு மருத்துவமனையில் தீவிர சிகிச்சைப் பிரிவில் அனுமதிக்கப்பட்டார்.

தற்போது, மருத்துவமனையில் இருந்தபோதிலும், சசிகாந்த் செந்தில் தனது உண்ணாவிரதத்தைத் தொடர்ந்து வருவதாகத் தகவல்கள் தெரிவிக்கின்றன.சசிகாந்த் செந்தில், மத்திய அரசு புதிய கல்விக் கொள்கையை (NEP) ஏற்காத மாநிலங்களைப் புறக்கணித்து, தமிழகத்திற்கு ரூ.2,152 கோடி நிதியை நிறுத்தி வைத்திருப்பதாகக் குற்றம்சாட்டியுள்ளார்.

இது தமிழக மாணவர்களின் கல்வி உரிமையைப் பறிப்பதாகவும், அரசியல் வற்புறுத்தல் மற்றும் மொழித் திணிப்பு இல்லாமல் அனைத்து குழந்தைகளுக்கும் சமமான கல்வி உரிமை கிடைக்க வேண்டும் என்றும் அவர் வலியுறுத்தியுள்ளார். இந்தப் போராட்டத்தில் திருவள்ளூர் வடக்கு மாவட்ட காங்கிரஸ் முன்னாள் தலைவர் ஏ.ஜி.சிதம்பரம் உள்ளிட்ட 20-க்கும் மேற்பட்ட காங்கிரஸ் நிர்வாகிகள் பங்கேற்றுள்ளனர்.