TVK கட்சி தலைவர் விஜய்க்கு தொலைபேசி வாயிலாக வாழ்த்து தெரிவித்தார் கமல்ஹாசன்.!

தமிழ் சினிமாவில் மிக முக்கிய நடிகராக வலம் வரும் நடிகர் விஜய், பல ஆண்டுகளாகவே தனது ரசிகர் மன்றங்களை விஜய் மக்கள் இயக்கம் என தன்னார்வ அமைப்பாக மாற்றி தமிழகத்தில் பல்வேறு சமயங்களில் பொதுமக்களுக்கு பல நலத்திட்ட உதவிகளை செய்து வருகிறார். தன்னார்வ அமைப்பாக செயல்பட்டு வந்த இந்த இயக்கத்தை நேற்று அரசியல் கட்சியாக பதிவு செய்து தனது அரசியல் பயணத்தையும் ஆரம்பித்து விட்டார் விஜய்.

விஜய் அரசியல் எதிர்காலம் எப்படி இருக்கும் என சொல்ல முடியாது.! – கனிமொழி பேட்டி.

“தமிழக வெற்றி கழகம்” என பெயரிடப்பட்டுள்ள தங்கள் கட்சியானது ஊழல் சக்திகளுக்கு எதிரானது, சாதி மத பேதம் என மக்களை பிரித்தாளும் கட்சிகளுக்கு எதிரானது என அறிக்கையும் வெளியிட்டுள்ளார். மேலும், 2026 தமிழக சட்டமன்ற தேர்தலில் வெற்றி பெறுவதே இலக்கு என்றும் அதில் குறிப்பிட்டுள்ளார் TVK கட்சி தலைவர் விஜய்.

நடிகர் விஜயின் அரசியல் வருகை பற்றி  பல்வேறு அரசியல் கட்சியினரும் தங்கள் கருத்துக்களை பதிவு செய்து வருகின்றனர். இதில் உதயநிதி ஸ்டாலின், சீமான் உள்ளிட்ட பலர் தங்கள் வாழ்த்துக்களை கூறி வரவேற்றனர். நடிகராக இருந்து அரசியலில் நுழைந்த விஜய்க்கு நடிகரும் மக்கள் நீதி மய்ய தலைவருமான கமல்ஹாசனும் வாழ்த்துக்களை தெரிவித்துள்ளர்.

கமல்ஹாசன், தொலைபேசியில் TVK கட்சி தலைவர் விஜயை அழைத்து வாழ்த்து தெரிவித்ததாக தகவல்கள் வெளியாகியுள்ளன. அரசியல் கட்சி தொடங்கிய முடிவுக்கு பாராட்டுகள் என்றும், 2026ஆம் ஆண்டு நடைபெற உள்ள தமிழக சட்டசபை தேர்தலில் பங்கேற்க உள்ள முடிவுக்கு வாழ்த்துகள் என்றும் மக்கள் நீதி மய்ய கட்சி தலைவர் கமல்ஹாசன் விஜய்க்கு வாழ்த்து கூறியுள்ளார் .