பயிர்களுக்கு உரிய இழப்பீடு வழங்கப்படும் – சட்டப்பேரவையில் முதல்வர் பேச்சு

தமிழக சட்டப்பேரவையில் சுற்றுச்சூழல் மற்றும் வனத்துறை மானியக் கோரிக்கை மீதான விவாதம் நடைபெற்றது. அப்போது விவசாய நிலங்களை காட்டுப்பன்றிகள் சேதப்படுத்தி வருவது குறித்த கேள்விக்கு பதில் அளித்த முதலமைச்சர் எடப்பாடி பழனிசாமி, காட்டுப் பன்றிகளால் சேதப்படுத்தப்படும் பயிர்களுக்கு உரிய இழப்பீடு வழங்கப்படும் என்று அறிவித்துள்ளார். இதையடுத்து காட்டுப்பன்றிகள் விளைநிலத்திற்குள் நுழைவதை தடுக்க, உரிய நடவடிக்கை எடுக்குமாறு அதிகாரிகளுக்கு உத்தரவிட்டிருப்பதாக குறிப்பிட்டார். 

இதைத்தொடர்ந்து விவாதத்தில் சுற்றுச்சூழல் குறித்து திமுக எம்எல்ஏ தா.மோ. அன்பரசன் கேள்வி எழுப்பினார். அதற்கு பதிலளித்த முதல்வர், விவசாயத்தை பாதிக்கும் எந்தவித புதிய ஹைட்ரோ கார்பன் திட்டங்களும் தமிழகத்தில் அனுமதிக்கப்பட மாட்டாது என்றும், விவசாயத்தையும், விவசாயிகளையும் பாதிக்கும் அத்திட்டத்தை அமல்படுத்த தடை விதிக்கும் வகையில்தான் காவெரி டெல்டா பகுதியை பாதுகாக்கப்பட்ட வேளாண் மண்டலமாக்கும் சட்டம் பேரவையில் நிறைவேற்றப்பட்டது என்று குறிப்பிட்டார்.