டெல்லி :மத்திய கிழக்கில் ஈரான் – இஸ்ரேல் – அமெரிக்கா இடையேயான போர் தீவிரமடைந்துள்ள நிலையில், துபாய் விமான நிலையம் முழுமையாக மூடப்பட்டது. ஈரானின் பதிலடி தாக்குதல்கள் காரணமாக விமான சேவைகள் முடங்கியதால், பல இந்தியர்கள் உட்பட பயணிகள் விமான நிலையங்களில் சிக்கி தவித்தனர். இந்த சூழலில் இந்திய பேட்மிண்டன் வீராங்கனை பி.வி. சிந்துவும் துபாயில் சிக்கினார்.
சிந்து ஆல் இங்கிலாந்து ஓபன் பேட்மிண்டன் போட்டிக்காக பர்மிங்காம் செல்ல துபாய் விமான நிலையத்தில் காத்திருந்தார். ஆனால் ஈரானின் ஏவுகணைத் தாக்குதல்கள் காரணமாக விமானங்கள் புறப்படவில்லை. சுமார் 8 மணி நேரம் விமான நிலையத்திலேயே காத்திருந்த சிந்து, விமான நிலையம் அருகே சக்திவாய்ந்த குண்டு வெடிப்பு சத்தத்தை கேட்டதாகவும், பயிற்சியாளர் புகை மண்டலத்தில் இருந்து தப்பியதாகவும் தெரிவித்தார்.
அந்த நொடிகள் மிகவும் பயங்கரமானவை என்று அவர் கூறினார்.தற்போது துபாய் அதிகாரிகள் மற்றும் இந்திய தூதரக உதவியுடன் சிந்து பாதுகாப்பாக இந்தியா திரும்பியுள்ளார். பெங்களூருவில் உள்ள தனது வீட்டிற்கு பத்திரமாக சென்றடைந்த அவர், X தளத்தில் நெகிழ்ச்சியுடன் பதிவிட்டுள்ளார். “கடந்த சில நாட்கள் பதற்றம் நிறைந்ததாக இருந்தது. பாதுகாப்பாக இந்தியா திரும்ப உதவிய அதிகாரிகள், விமான நிலைய ஊழியர்களுக்கு மனமார்ந்த நன்றி” என்று அவர் எழுதியுள்ளார்.
சிந்து தனது பதிவில், கடினமான சூழலிலும் துபாய் விமான நிலையத்தில் பாதுகாப்பை உறுதி செய்த அனைவருக்கும் நன்றி தெரிவித்துள்ளார். “நாடு திரும்பியது மகிழ்ச்சி அளிக்கிறது” என்று குறிப்பிட்டுள்ள அவர், போர் பதற்றத்தால் ஏற்பட்ட அச்சத்திலிருந்து மீண்டதை நெகிழ்ச்சியுடன் பகிர்ந்துள்ளார். இந்திய தூதரகம் மற்றும் துபாய் அதிகாரிகளின் உதவியால் பல இந்தியர்கள் பத்திரமாக திரும்பி வருகின்றனர்.
ஒட்டுமொத்தமாக, ஈரான் – இஸ்ரேல் மோதல் காரணமாக துபாய் விமான சேவை முடங்கிய நிலையில், பி.வி. சிந்து போன்ற பிரபல வீராங்கனை பாதுகாப்பாக திரும்பியது மக்களுக்கு நம்பிக்கை அளித்துள்ளது. இந்திய அரசு வெளிநாடுகளில் சிக்கியுள்ள இந்தியர்களை மீட்க தீவிர நடவடிக்கைகளை மேற்கொண்டு வருகிறது. சிந்துவின் பதிவு இந்த சூழலில் பலருக்கு ஆறுதலாக அமைந்துள்ளது.