வாஷிங்டன் :ஈரான் – இஸ்ரேல் – அமெரிக்கா இடையேயான போர் தற்போது 11-ஆம் நாளை எட்டியுள்ள நிலையில், அமெரிக்க அதிபர் டொனால்ட் டிரம்ப் போரை எந்த நேரத்திலும் நிறுத்துவேன் என்று அறிவித்துள்ளார். செய்தியாளர்கள் சந்திப்பில் பேசிய அவர், “ஈரான் உடனான போரை எந்த நேரத்திலும் நிறுத்துவேன். எனினும், தற்போது அந்நாட்டில் தாக்குவதற்கு கிட்டத்தட்ட எதுவும் இல்லை; போர் சிறப்பாக நடந்து கொண்டிருக்கிறது” என்று தெரிவித்தார். இந்த அறிக்கை உலக அளவில் பெரும் கவனத்தை ஈர்த்துள்ளது.
டிரம்ப் தனது உரையில், கடந்த 6 வார காலத்தில் நாங்கள் நினைத்ததை விட அதிக சேதங்களை ஏற்படுத்தியுள்ளோம் என்று பெருமிதம் தெரிவித்தார். ‘ஆபரேஷன் எபிக் ஃபூரி’ (Operation Epic Fury) என்ற இந்த தாக்குதல் நடவடிக்கை முழு வெற்றி பெற்றுள்ளதாகவும், ஈரானுக்கு எதிரான தாக்குதல்களில் அமெரிக்கா முழு வெற்றி அடைந்துள்ளதாகவும் அவர் கூறினார். ஈரானின் ராணுவ வலிமை பெருமளவு அழிக்கப்பட்டுள்ளதால், போரை நிறுத்துவதற்கு தயாராக இருப்பதாகவும் அவர் தெரிவித்தார்.
அமெரிக்க ராணுவம் கடந்த 11 நாட்களில் ஈரானை கிட்டத்தட்ட அழித்துவிட்டதாக டிரம்ப் விவரித்தார். ஈரானின் விமானப்படை முழுமையாக அழிக்கப்பட்டுள்ளதாகவும், 90 சதவீத ஏவுகணைகள் மற்றும் 86 சதவீத ட்ரோன்கள் சுட்டு வீழ்த்தப்பட்டுள்ளதாகவும் அவர் குறிப்பிட்டார். இதனால் ஈரானிடம் இனி அழிப்பதற்கு எதுவும் இல்லை என்று அவர் கூறினார்.
இந்த தாக்குதல்கள் ஈரானின் ராணுவ உள்கட்டமைப்பை பெரிதும் பலவீனப்படுத்தியுள்ளதாக அமெரிக்க அதிகாரிகள் உறுதிப்படுத்தியுள்ளனர்.இருப்பினும், போரை உடனடியாக நிறுத்துவதற்கு தயாராக இல்லை என்று டிரம்ப் மறைமுகமாக தெரிவித்துள்ளார். ஈரான் தனது நிபந்தனைகளை ஏற்கும் வரை அல்லது முழுமையாக சரணடையும் வரை தாக்குதல்கள் தொடரலாம் என்று அவர் சுட்டிக்காட்டினார்.
இந்த அறிக்கை ஈரான் தரப்பில் கடும் கண்டனத்தை ஏற்படுத்தியுள்ளது. ஈரான் அதிபர் மசூத் பெசெஷ்கியான் இதை “அமெரிக்காவின் கொடூரத்தனம்” என்று விமர்சித்துள்ளார்.ஒட்டுமொத்தமாக, டிரம்பின் இந்த அறிக்கை போரின் போக்கை மாற்றும் வகையில் அமைந்துள்ளது. போர் நீடித்தால் உலக அளவில் எண்ணெய் விலை உயர்வு, பொருளாதார நெருக்கடி போன்றவை அதிகரிக்கும். இந்த அறிக்கை உலக நாடுகளுக்கு சமாதான பேச்சுவார்த்தைக்கான ஒரு சமிக்ஞையாகவும் பார்க்கப்படுகிறது. ஈரான் தரப்பு இதற்கு எப்படி பதிலளிக்கும் என்பது வரும் நாட்களில் தெரியவரும்.