சென்னை :தமிழ்நாடு அமைச்சர் கே.என்.நேரு, ஆளுநர் ஆர்.என்.ரவியின் சுதந்திர தின உரை குறித்து வெளியிட்ட அறிக்கையில், ஆளுநரின் கருத்துகள் ஆதாரமற்றவை மற்றும் அவதூறு பரப்புவதாக விமர்சித்தார்.
ஆளுநர் தமிழ்நாட்டில் போதைப்பொருள் பயன்பாடு மற்றும் பாலியல் வன்கொடுமைகள் அதிகரிப்பதாகக் கூறியதை, “கிண்டி கமலாலயத்தில் இருந்து வெளியிடப்பட்ட அறிக்கை” என்று கேலி செய்து, அது பாஜகவின் அரசியல் நோக்கத்துடன் உள்ளதாகவும், ஆதாரமற்ற குற்றச்சாட்டுகளை உள்ளடக்கியதாகவும் குறிப்பிட்டுள்ளார்.
கே.என்.நேரு, ஆளுநரின் குற்றச்சாட்டுகளுக்கு மக்களால் தேர்ந்தெடுக்கப்பட்ட அரசு ஏற்கனவே ஆதாரங்களுடன் பதிலளித்துவிட்டதாகவும், ஆளுநர் தமிழ்நாட்டிற்கு எதுவும் செய்யவில்லை என்று கூறி நெல்லை மனோன்மணியம் சுந்தரனார் பல்கலைக்கழகத்தில் பட்டம் பெற மறுத்து அவமானப்பட்டதற்கு பதிலடியாக இந்த அறிக்கையை வெளியிட்டதாகவும் தெரிவித்தார்.
மேலும், பாஜக, தங்களுக்கு வேண்டாத மாநிலங்களுக்கு ஆளுநர் என்னும் நச்சுப் பாம்பை அனுப்பி குடைச்சல் கொடுத்து வருகிறது. அப்படித் தமிழ்நாட்டுக்கு அனுப்பி வைத்த ஆர். எஸ்.எஸ்-கைக்கூலிதான் ஆளுநர் ஆர்.என்.ரவி. அமைச்சர்கள் நியமனம், மசோதாக்கள் நிறுத்தி வைப்பு, ஆளுநர் உரையில் ஆரியத் திணிப்பு என எதிலாவது ஆளுநர் ரவி வெற்றி பெற்றிருக்கிறாரா?
அவமானங்களை மட்டுமல்ல, தொடர் தோல்விகளையும் தாங்கிக் கொள்வது அரிய கலை. ராஜ்பவனை ஆளுநர் ரவி அரசியல் பவனாக மாற்றி, கரை வேட்டிக் கட்டிய அரசியல்வாதி போலச் செயல்படுகிறார். ஆளுநரின் அறிக்கையைப் படித்தால் அமித் ஷாவே சிரிப்பார்.
ஆளுநர் ஆர்.எஸ்.எஸ்-ன் கைக்கூலியாகவும், திராவிட மாடலுக்கு எதிராக வெறுப்பை வெளிப்படுத்தும் நாக்பூரின் ஏஜெண்டாகவும் செயல்படுவதாக கடுமையாக விமர்சித்தார். தமிழ்நாடு பொருளாதார வளர்ச்சியில் 11.19% இரட்டை இலக்க வளர்ச்சி எட்டியுள்ளதாகவும், கல்வி, பாலின சமத்துவம், மற்றும் இளைஞர் மேம்பாட்டில் முன்னோடியாக உள்ளதாகவும், ஆளுநரின் குற்றச்சாட்டுகள் பொய்யானவை என்று நேரு சுட்டிக்காட்டினார்.
ஒன்றிய அரசு தமிழ்நாட்டிற்கு நிதி ஒதுக்கீட்டில் புறக்கணிப்பதாகவும், கீழடி அகழ்வாராய்ச்சி அறிக்கையை ஏற்க மறுப்பதாகவும் குற்றம்சாட்டினார். ஆளுநரின் அறிக்கையைப் படித்தால், “அமித் ஷாவே சிரிப்பார்” என்று கூறி, அதை “நகைச்சுவையான” மற்றும் “அசிங்கமான அரசியல்” என்று விமர்சித்தார்.
unknown node