லியோ முதல் நாள் வசூலை நெருங்குமா புஷ்பா 2? ஸ்கெட்ச் போடும் விநியோகஸ்தர்!

கேரளா : விஜய் படங்கள் கேரளாவில் வெளியானால் போதும் வசூல் ரீதியாகப் பெரிய சாதனைகளைப் படைத்து விடும். அதற்கு உதாரணமாகச் சொல்லவேண்டும் அவருடைய நடிப்பில் வெளியாகி ஹிட்டான லியோ படத்தினை சொல்லலாம். லியோ படம் கேரளாவில் மட்டும் மொத்தமாக 60 கோடிகள் வரை வசூல் செய்திருந்தது.

வெளியான முதல் நாளில் மட்டும் கேரளாவில் 12 கோடி வரை வசூல் செய்திருந்தது. இது தான் கேரளாவில் அதிகம் வசூல் செய்த முதல் தமிழ் திரைப்படம் என்ற சாதனையையும் படைத்திருந்தது. அதைப்போல, கேரளாவில் அதிகம் மொத்தமாக வசூல் செய்த படம் என்ற சாதனையையும் லியோ படம் தான் வைத்து இருக்கிறது.

இந்த சூழலில், லியோ படத்தின் கேரளாவின் முதல் நாள் வசூல் சாதனையை புஷ்பா 2 படம் முறியடிக்க வைக்க திட்டமிடப்பட்டுள்ளதாக படத்தின் கேரளா திரையரங்கு வெளியீட்டு உரிமையை வாங்கியுள்ள விநியோகஸ்தர் முகேஷ் மேத்தா தெரிவித்துள்ளார். புஷ்பா 2 படம் வரும் டிசம்பர் 6-ஆம் தேதி திரையரங்குகளில் வெளியாகவுள்ளது. எனவே, படத்தின் வியாபாரம் மற்றும் ப்ரோமோஷன் பணிகள் சூடுபிடிக்கத் தொடங்கியுள்ளது.

படத்தின் கேரளா திரையரங்கு வெளியீட்டு உரிமையைக் கோகுலம் நிறுவனம் வாங்கியுள்ளது. எனவே, ப்ரோமோஷன் வேலைகளைத் தொடங்கியுள்ளது. அதன் ஒரு பகுதியாகத் தான் படத்தின் ப்ரோமோஷன் நிகழ்ச்சி சமீபத்தில் கேரளாவில் நடைபெற்றது.

அதில் கலந்து கொண்ட படத்தின் கேரளா விநியோகஸ்தர் முகேஷ் மேத்தா பேசும்போது ” கேரளாவில் முதல் நாளில் அதிகம் வசூல் செய்த படம் என்றால் லியோ தான். அந்த படத்தின் வசூல் சாதனையை புஷ்பா தொடுவதற்கான வேலைகளைச் செய்யப்பட்டு வருகிறது. இதன் காரணமாக, 24 மணி நேரமும் திரையரங்கில் ஒரு காட்சி படத்தை ஓட வைக்க முடிவு செய்து இருக்கிறோம் ” எனத் தெரிவித்தார். எனவே, லியோ முதல் நாள் வசூலை புஷ்பா 2 முறியடிக்குமா? என்ற எதிர்பார்ப்பு எழுந்துள்ளது.