எங்கள் கூட்டணியில் ஓ.பன்னீர்செல்வமும், தினகரனும் இல்லை -நயினார் நாகேந்திரன் விளக்கம்!

சென்னை :தமிழக பாஜக மாநில தலைவர் நயினார் நாகேந்திரன் சென்னையில் செய்தியாளர்களை சந்தித்து தமிழக வெற்றிக் கழகம் (தவெக) தலைவர் விஜய் குறித்து கடுமையான விமர்சனங்களை வைத்தார். விஜய்யின் அரசியல் பிரவேசத்தை சினிமா உலகத்துடன் ஒப்பிட்டு பேசிய அவர், தவெகவுக்கு அடிப்படை கட்சி அமைப்பு இல்லை என்று சாடினார்.“திமுகவுக்கும் தவெகவுக்கும்தான் போட்டி என்று விஜய் சொல்லி வருகிறார்.

இது ஒன்றும் சினிமா அல்ல. 234 தொகுதிகள் உள்ள நிலையில் 10 வேட்பாளர்களின் பெயர்களை விஜயால் சொல்ல முடியுமா? தவெகவில் கட்டமைப்பே கிடையாது. வாக்குச்சாவடி பொறுப்பாளர்களே இல்லை” என்று நயினார் நாகேந்திரன் கடுமையாக விமர்சித்தார்.“இந்தியாவையே நாளை பிடித்துவிடுவேன் என்று கூட விஜய் சொல்லலாம். ஆனால், இது சினிமா அல்ல” என்று கூறிய அவர், விஜய்யின் அரசியல் அறிவிப்புகளை ஏளனமாகப் பார்த்தார். தவெகவின் அரசியல் உத்திகள் மற்றும் கட்சி அமைப்பு குறித்து அவர் தொடர்ந்து விமர்சனம் வைத்தார்.

NDA கூட்டணி குறித்து பேசிய நயினார் நாகேந்திரன், “ஓ.பன்னீர்செல்வமும் தினகரனும் எங்கள் கூட்டணியில் தற்போதைக்கு இல்லை. அதிமுக கூட்டணியில் தொகுதி பங்கீடு தொடர்பாக வெளிவரும் தகவல்களில் உண்மை இல்லை. 2026 தேர்தலில் திமுகவுக்கு மாற்று அரசாக தேசிய ஜனநாயக கூட்டணி ஆட்சி அமைய வேண்டும்” என்று தெரிவித்தார்.

திமுகவை விமர்சித்த அவர், “கனிமொழி தலைமையில் தேர்தல் அறிக்கை தயாரிக்க கமிட்டி போடப்பட்டுள்ளது. எதற்கு இத்தனை அவசரம் என்று புரியவில்லை. மீண்டும் அதே பழைய தேர்தல் அறிக்கையா?” என்று கேள்வி எழுப்பினார்.இந்தப் பேச்சு தமிழக அரசியல் வட்டாரங்களில் பெரும் பரபரப்பை ஏற்படுத்தியுள்ளது. நயினார் நாகேந்திரனின் விமர்சனங்கள் தவெகவின் அரசியல் வளர்ச்சியை கேள்விக்குள்ளாக்கியுள்ளன. அதேநேரம், NDA கூட்டணியின் திட்டங்களை வலியுறுத்தியுள்ள இந்தப் பேச்சு 2026 தேர்தல் களத்தை மேலும் சூடாக்கியுள்ளது.