பதவி கொடுக்கும்போது அதிருப்தி வருவது இயல்புதான்...அஜிதா பிரச்சினை குறித்து விளக்கம் கொடுத்த நிர்மல் குமார்!

சென்னை :பனையூரில் உள்ள தமிழக வெற்றிக் கழகம் (தவெக) தலைமை அலுவலகத்தில் இன்று (டிசம்பர் 23, 2025) காலை 10 மணி முதல் பெரும் பரபரப்பு நிலவியது. தூத்துக்குடி மாவட்ட பெண் நிர்வாகி அஜிதா ஆக்னல் தனது ஆதரவாளர்களுடன் அலுவலக வாயிலுக்கு வெளியே காத்திருந்தார். மாவட்டச் செயலாளர் பதவி மறுக்கப்பட்டதால் ஏற்பட்ட அதிருப்தியால் அவர் இந்த போராட்டத்தில் ஈடுபட்டார்.

விஜய் அலுவலகத்துக்கு வந்தபோது, அஜிதா திடீரென அவரது காரை வழிமறித்து நிறுத்த முயன்றார். ஆனால், பாதுகாவலர்கள் உடனடியாக தலையிட்டு அவர்களை விலக்கினர். விஜய் எந்தப் பேச்சுவார்த்தையும் நடத்தாமல் அலுவலகத்துக்குள் சென்றுவிட்டார். பின்னர் விஜய் அலுவலகத்திலிருந்து புறப்பட்டுச் சென்றபோது மீண்டும் அஜிதா காரை மறிக்க காத்திருந்தார்.அஜிதாவின் ஆதரவாளர்கள், “25-30 ஆண்டுகள் விஜய்க்காக உழைத்திருக்கிறோம்; பொறுப்பு தராமல் எங்கேயும் போக மாட்டோம். போகிற உசுரு கட்சி வாசலிலேயே போகட்டும்” என்று உணர்ச்சிவசப்பட்டு கூறினர்.

இதனால் அலுவலக வளாகத்தில் பதற்றம் அதிகரித்தது.தவெக இணை பொதுச்செயலாளர் சி.டி.ஆர். நிர்மல்குமார் அஜிதாவுடன் பேச்சுவார்த்தை நடத்தினார். அதன்பிறகு செய்தியாளர்களை சந்தித்த நிர்மல் “பதவி கொடுக்கும்போது அதிருப்தி வருவது இயல்புதான். விஜய் அனைவரையும் அரவணைப்பார். திமுகவை போல தவெகவில் குறுநில மன்னர்கள் இல்லை; திமுகவைவிட தவெகவில் ஜனநாயகம் உள்ளது” என்று அவர் விளக்கமளித்தார்.

இந்தச் சம்பவம் தவெகவில் மாவட்டச் செயலாளர் நியமனங்களால் ஏற்பட்ட உட்கட்சி அதிருப்தியை வெளிப்படுத்தியுள்ளது. அஜிதா அலுவலகத்துக்குள் அனுமதிக்கப்படாததால் அவரது ஆதரவாளர்கள் ஏமாற்றம் அடைந்தனர். கட்சி நிர்வாகம் இதை சமாளிக்க முயற்சித்த போதிலும், இந்தப் பிரச்சினை கட்சியின் உள் அமைப்பு குறித்த விவாதத்தை ஏற்படுத்தியுள்ளது.