#BREAKING: எழுவர் விடுதலை – குடியரசு தலைவரிடம் கோப்புகள்!

7 பேர் விடுதலை தொடர்பான கோப்புகள் அனைத்தும் குடியரசு தலைவருக்கு அனுப்பப்பட்டுள்ளன என தமிழக அரசு தகவல்.

ராஜீவ்காந்தி கொலை வழக்கில் தண்டனை பெற்ற பேரறிவாளன் உள்ளிட்ட 7 பேர் விடுதலை தொடர்பான கோப்புகள் அனைத்தும் குடியரசு தலைவருக்கு அனுப்பப்பட்டுள்ளன என்று சென்னை உயர்நீதிமன்றத்தில் தமிழக அரசு தகவல் தெரிவித்துள்ளது. ஆளுநரிடம் இருந்து ஜனவரி 27-ஆம் தேதி குடியரசு தலைவருக்கு கோப்புகள் அனுப்பப்பட்டதாக தமிழக அரசு கூறியுள்ளது. ராஜீவ் காந்தி கொலை வழக்கில் தண்டனை பெற்ற பேரறிவாளன், முருகன், நளினி, ராபர்ட் பயாஸ், சாந்தன், ரவி, ஜெயக்குமார் ஆகிய பேரின் விடுதலை தொடர்பாக சென்னை உயர்நீதிமன்றத்தில் வழக்கு தொடுக்கப்பட்டது.

ரவிச்சந்திரன் என்பவர் பேரறிவாளன் உள்ளிட்ட 7 பேரையும் விடுதலை செய்ய வேண்டும் என்று வழக்கு தொடுத்திருந்தார். இதற்கிடையில் நளினி, தன்னை முன்கூட்டியே விடுதலை செய்ய வேண்டும் என வழக்கு தொடுத்திருந்தார். இந்த வழக்கு தலைமை நீதிபதி கொண்ட அமர்வில் விசாரணை நடைபெற்று வருகிறது. கடந்த முறை விசாரணைக்கு வந்தபோது, 7 பேரின் கோப்புகள் ஆளுநருக்கு அனுப்பப்பட்டதா அல்லது ஜாமீன் பெற்றுள்ள பேரறிவாளன் வழக்கு மட்டும் அனுப்பப்பட்டதா என நீதிமன்றம் கேள்வி எழுப்பியது.

7 பேர் விடுதலை தொடர்பான கோப்புகள் அனைத்தும் குடியரசு தலைவருக்கு அனுப்பட்டுள்ளது என தமிழக அரசு தெரிவித்த நிலையில், எந்த தேதியில் அனுப்பட்டது என தெரிவிக்கவில்லை. இந்த நிலையில் இதுதொடர்பாக அரசு தரப்பு வழக்கறிஞர் இன்று சென்னை உயர்நீதிமன்றத்தில் ஆஜராகி, கோப்புகள் அனைத்தும் ஜனவரி 27-ஆம் தேதி குடியரசு தலைவருக்கு அனுப்பப்பட்டதாக தகவல் தெரிவித்துள்ளார்.