தஞ்சாவூர் :செங்கிப்பட்டியில் இன்று (மார்ச் 4, 2026) தவெக நிர்வாகிகள் சந்திப்பு கூட்டம் நடைபெற்றது. இக்கூட்டத்தில் தவெக தலைவர் நடிகர் விஜய் கலந்துகொண்டு சிறப்புரை ஆற்றினார். விவசாயிகள், ரேஷன் கடைகள், பெண்கள் நலன், கல்வி உள்ளிட்ட பல்வேறு முக்கிய வாக்குறுதிகளை அவர் அறிவித்தார்.விவசாயிகளுக்கு முன்னுரிமை அளிக்கும் வகையில், 5 ஏக்கருக்கும் குறைவான நிலம் உள்ள விவசாயிகளின் வேளாண் பயிர் கடன் முழுமையாக தள்ளுபடி செய்யப்படும் என்று விஜய் அறிவித்தார்.
5 ஏக்கருக்கு மேல் நிலம் உள்ளவர்களின் கடனுக்கு 50% தள்ளுபடி செய்யும் வாய்ப்பு ஆராயப்படும் என்றும் கூறினார். 2 ஏக்கருக்கும் குறைவான நிலம் உள்ள விவசாயிகளின் பிள்ளைகளின் கல்விச் செலவை தவெக ஆட்சி முழுமையாக ஏற்கும் என்றும் உறுதியளித்தார். ரேஷன் கடைகள் தொடர்பாக முக்கிய அறிவிப்புகள் வெளியிடப்பட்டன. 500 ரேஷன் கார்டுகளுக்கு ஒரு ரேஷன் கடை அமைக்கப்படும்.
ரேஷன் கடைகளில் பெண்களுக்கு பெண் எடையாளர், ஆண்களுக்கு ஆண் எடையாளர் நியமிக்கப்படுவர். அரிசி தவிர மற்ற அனைத்து பொருட்களும் பாக்கெட் செய்யப்பட்டு விற்கப்படும். நெல் கொள்முதல் நிலையங்களில் கமிஷன் வாங்குவது தடுக்கப்படும் என்றும் விஜய் தெரிவித்தார்.விவசாயிகளின் நலனுக்கு எதிரான எந்த திட்டத்தையும் தவெக ஆட்சியில் செயல்படுத்த மாட்டோம் என்று விஜய் உறுதியளித்தார். மத்திய அரசு நெருக்கடி கொடுத்தாலும் விவசாயிகளுக்கு எதிரான திட்டங்கள் செயல்படுத்தப்படாது என்றும், எப்போதும் விவசாயிகள் பக்கமே நமது ஆட்சி இருக்கும் என்றும் அவர் தெரிவித்தார்.
நெல் மூட்டைகள் வீணாவது தடுக்கப்படும் என்றும் கூறினார்.ஒட்டுமொத்தமாக, தஞ்சை கூட்டத்தில் விஜய் ஆற்றிய உரை தவெகவின் விவசாயிகள் மைய கொள்கையை வலியுறுத்துவதாக அமைந்தது. தவெக ஆட்சியில் விவசாயிகளுக்கு முன்னுரிமை, ஊழலற்ற நிர்வாகம், சமூக நீதி ஆகியவை முதன்மை பெறும் என்று அவர் உறுதியளித்தார். இந்த அறிவிப்புகள் தமிழக விவசாயிகள் மற்றும் பொதுமக்களிடையே பெரும் எதிர்பார்ப்பை ஏற்படுத்தியுள்ளன.