ஐபிஎல் 2024: மீண்டும் கேப்டனாக ஷ்ரேயாஸ் ஐயர் நியமனம்.. கேகேஆர் அறிவிப்பு!

by பாலா கலியமூர்த்திPosted on December 14, 2023

இந்தியாவில் நடைபெறும் மிகப் பெரிய கிரிக்கெட் தொடர் என்றால் அது இந்தியன் பிரீமியர் (ஐபிஎல்) லீக்தான். கடந்த 2008ம் ஆண்டு தொடங்கப்பட்ட ஐபிஎல் தொடர், உலகில் அளவில் அதிகம் கவனிக்கப்படும் தொடராக மாறியுள்ளது. இந்த சூழலில், அடுத்தாண்டு ஐபிஎல் தொடரின் 17வது சீசன் நடைபெற உள்ளது. இதற்காக இபிஎல் 10 அணி நிர்வாகமும் தங்களது வீரர்கள் தேர்வில் மும்மரமாக செயல்பட்டு வருகிறது.

அதுமட்டுமில்லாமல், வரும் 19ம் தேதி ஐபிஎல் தொடருக்கான மினி ஏலம் துபாயில் முதல்முறையாக நடைபெற உள்ளது. இதனால், எந்தந்த அணிகளுக்கு எந்தந்த வீரர்கள் செல்வார்கள் என எதிர்பார்த்து ரசிகர்கள் காத்திருக்கின்றனர். இந்த நிலையில், முதுகில் ஏற்பட்ட காயம் காரணமாக 2023 சீசனைத் தவறவிட்ட ஷ்ரேயாஸ் ஐயர், 2024 ஐபிஎல் தொடரில் கொல்கத்தா நைட் ரைடர்ஸ் அணியின் கேப்டனாக மீண்டும் நியமிக்கப்பட்டுள்ளார்.

பாபர் அசாமை ஓரம்கட்டி.. பாகிஸ்தானிலும் ஆதிக்கம் செலுத்தும் இந்திய வீரர் சுப்மான் கில்!

இதுபோன்று, கடந்த சீசனில் கொல்கத்தா நைட் ரைடர்ஸ் அணியின் ஸ்டாண்ட்-இன் கேப்டனாக இருந்த நிதிஷ் ராணா, 2024 ஐபிஎல் தொடரில் துணைக் கேப்டனாக நியமிக்கப்பட்டுள்ளார். இதனிடையே, கடந்த 2 ஆண்டுகளாக லக்னோ சூப்பர் ஜெயிண்ட்ஸ் அணியின் ஆலோசகராக இருந்த கவுதம் கம்பீரின் ஒப்பந்த காலம் முடிந்ததால், தற்போது மீண்டும் கொல்கத்தா நைட் ரைடர்ஸ் அணிக்கே திரும்பியிருந்தார்.

கொல்கத்தா அணிக்கு ஆலோசகராக கம்பீர் வந்துள்ளதால் பெரும் எதிர்பார்ப்பு கிளம்பியுள்ளது. மேலும், 2024 ஐபிஎல் தொடரில் விளையாடுவதற்காக தக்கவைத்துள்ள வீரர்களின் பட்டியலை கொல்கத்தா அணி வெளியிட்டிருந்தது. ஷ்ரேயாஸ் ஐயர், நிதிஷ் ராணா, ரிங்கு சிங், ஜேசன் ராய், ஆண்ட்ரே ரஸ்ஸல், சுனில் நரைன் உள்ளிட்ட 13 வீரர்களை அந்த அணி தக்க வைத்த நிலையில், ஷ்ரேயாஸ் ஐயர் மீண்டும் கேப்டனாக நியமிக்கப்பட்டுள்ளார்.