ஐபிஎல் 2024 : நிதிஷ் ரெட்டி அரைசதம்..! பந்து வீச்சில் மிரட்டிய அர்ஷ்தீப் சிங்..!

ஐபிஎல் 2024 : முதலில் இறங்கிய ஹைதராபாத் அணி 20 ஓவரில் 9 விக்கெட்டை இழந்து 182 ரன்கள் எடுத்தனர்.

இன்று நடைபெற்று வரும் ஐபிஎல்  போட்டியில் பஞ்சாப் கிங்ஸ் அணியும், சன்ரைசர்ஸ் ஹைதராபாத் அணியும் மோதி வருகிறது. இந்த போட்டி சண்டிகாரில் நடைபெற்று வருகிறது. டாஸ் வென்ற பஞ்சாப் அணி பந்து வீச தேர்வு செய்தது. அதன்படி ஹைதராபாத் அணியில் தொடக்க வீரர்களாக டிராவிஸ் ஹெட், அபிஷேக் சர்மா இருவரும் களமிறங்கினர்.

நிதானமாக விளையாடிய டிராவிஸ் ஹெட் 21 ரன் எடுத்து தவானிடம் கேட்சை கொடுத்து வெளியேறினார். அடுத்து வந்த ஐடன் மார்க்ராம் வந்த வேகத்தில் டக் அவுட் ஆகி வெளியேறினார். அடுத்து நிதிஷ் ரெட்டி களமிறங்கினார். அடுத்த ஓவரிலே மறுமுனையில் அபிஷேக் சர்மா 11 ரன் எடுத்து விக்கெட்டை இழந்தார்.

இதனால் ஹைதராபாத் அணி  பவர் பிளே முடிவதற்குள் 3 விக்கெட்டை பறிகொடுத்தனர். அடுத்து வந்த ராகுல் திரிபாதி 11 , ஹென்ரிச் கிளாசென் 9 ரன்களில் பெவிலியன் திரும்பினர். பின்னர் கூட்டணி அமைத்த நிதிஷ் ரெட்டி , அப்துல் சமது இருவரும் சிறப்பாக விளையாடினர். இதற்கிடையில் நிதிஷ் ரெட்டி 31 பந்தில் 51 ரன்கள் எடுத்து அரைசதம் அடித்தார்.

நிதானமாக விளையாடி வந்த அப்துல் சமது 12 பந்தில் 25 ரன்கள் குவித்து விக்கெட்டை பறிகொடுத்தார். நிதிஷ் ரெட்டி, அப்துல் சமது இருவரும் சேர்ந்து 19 பந்தில் 50 ரன்கள் குவித்தனர். அப்துல் சமது ஆட்டமிழந்த அடுத்த 2-வது பந்திலே நிதிஷ் ரெட்டியும்  64 ரன்கள் எடுத்து நடையை காட்டினார்.

இறுதியாக ஹைதராபாத் அணி 20 ஓவரில் 9 விக்கெட்டை இழந்து 182 ரன்கள் எடுத்தனர். பஞ்சாப் அணியில் அர்ஷ்தீப் சிங் 4 விக்கெட்டையும், ஹர்ஷல் படேல், சாம் கரன் தலா 2 விக்கெட்டையும்,  ரபாடா 1 விக்கெட்டை பறித்தனர்.