தேவையில்லாத விமர்சனங்கள்...ஹரித்வார் செல்கிறேன்! -செங்கோட்டையன் பேச்சு!

சென்னை :முன்னாள் அமைச்சரும், அதிமுக மூத்த தலைவருமான கே.ஏ. செங்கோட்டையன், செப்டம்பர் 8, 2025 அன்று கோவை சர்வதேச விமான நிலையத்தில் இருந்து டெல்லி புறப்பட்டார். அவர், ஆன்மிக பயணமாக ஹரிதுவாரில் உள்ள ராமர் கோயிலுக்கு செல்வதாகவும், இந்தப் பயணத்திற்குப் பின் அடுத்தகட்ட அரசியல் நடவடிக்கைகள் குறித்து அறிவிப்பதாகவும் தெரிவித்தார். இந்த பயணம், அதிமுகவில் அவரது பதவி நீக்கம் மற்றும் கட்சி ஒருங்கிணைப்பு குறித்து அவர் எடுத்த முயற்சிகளால் ஏற்பட்ட பரபரப்புக்கு மத்தியில் நடைபெறுகிறது.

செங்கோட்டையன், கோவையில் செய்தியாளர்களைச் சந்தித்தபோது, பாஜக தலைவர்களை சந்திக்கவில்லை என்று திட்டவட்டமாக மறுத்தார். “நான் ஹரிதுவாரில் உள்ள ராமர் கோயிலுக்கு செல்கிறேன். மன அமைதி தேவைப்படுவதால் இந்த ஆன்மிக பயணத்தை மேற்கொள்கிறேன். கம்பராமாயணத்தில் வரும் ராமரை மட்டுமே சந்திக்கப் போகிறேன், வேறு யாரையும் அல்ல,” என்று அவர் கூறினார். மேலும், “இங்கே இருந்தால் பல்வேறு விமர்சனங்கள் வருகின்றன. ஒவ்வொருவரும் ஒரு கருத்து சொல்கிறார்கள். அமைதியாக வழிபடுவதற்காகவே இந்த பயணம்,” என்று விளக்கினார்.

அதிமுகவை ஒருங்கிணைக்க வேண்டும் என்று கூறி, கட்சியில் இருந்து வெளியேறியவர்களை மீண்டும் இணைக்க எடப்பாடி கே. பழனிசாமிக்கு 10 நாட்கள் கெடு விதித்திருந்தார் செங்கோட்டையன். இதைத் தொடர்ந்து, அவரது கட்சி பொறுப்புகள் பறிக்கப்பட்டன, மேலும் அவரது ஆதரவாளர்கள் ஆயிரத்திற்கும் மேற்பட்டோர் தங்கள் பொறுப்புகளை ராஜினாமா செய்தனர்.

இந்த சூழலில், “எனது கருத்துக்கு எதிராக யாரும் பேசவில்லை. தொண்டர்கள் என்னை ஆதரிக்கிறார்கள், நியாயமான கோரிக்கையைத்தான் வைத்திருக்கிறேன் என்று கூறுகிறார்கள். கடந்த இரண்டு நாட்களில் 10,000-த்திற்கும் மேற்பட்டோர் என்னை சந்தித்து ஆதரவு தெரிவித்துள்ளனர்,” என்று செங்கோட்டையன் குறிப்பிட்டார்.

மேலும், பாஜக தலைவர்களுடனான சந்திப்பு வதந்திகள் குறித்து மறுப்பு தெரிவித்த அவர், “ஓ. பன்னீர்செல்வம் (ஓபிஎஸ்) என்னை சந்திக்க வருவதாக வந்த வதந்தியும் உண்மையில்லை. டி.டி.வி. தினகரனின் கருத்துக்கு நான் பதில் சொல்ல முடியாது. நல்லதற்காகவே நான் பேசுகிறேன். பொதுச்செயலாளர் எடுத்த முடிவுகளுக்கு கருத்து சொல்ல முடியாது, காலமே பதில் சொல்லும்,” என்றார். மேலும், செப்டம்பர் 9-ல் செய்தியாளர் சந்திப்பு இல்லை என்றும், திருமண விழாக்கள் மற்றும் மருத்துவமனை திறப்பு போன்ற வழக்கமான பணிகளில் ஈடுபட்டு வருவதாகவும் தெரிவித்தார்.