தமிழ்நாட்டில் ஏப்ரல் 23, 2026 அன்று ஒரே கட்டமாக நடைபெற்ற சட்டமன்றத் தேர்தலில், மொத்தம் உள்ள 75,064 வாக்குச்சாவடிகளில் எந்த ஒரு வாக்குச்சாவடியிலும் மறுவாக்குப்பதிவு தேவைப்படவில்லை என்று தேர்தல் ஆணையம் அதிகாரப்பூர்வமாக அறிவித்துள்ளது.வாக்குப்பதிவு முழுமையாக சுமூகமாகவும், அமைதியாகவும் நடைபெற்றதால், மறுவாக்குப்பதிவு நடத்துவதற்கான எந்தவித சூழலும் ஏற்படவில்லை என்று தேர்தல் ஆணையம் தெரிவித்துள்ளது.
இது தமிழ்நாட்டில் சமீபகாலமாக நடைபெற்ற தேர்தல்களில் மிகவும் சிறப்பான மற்றும் சுமூகமான வாக்குப்பதிவாக பார்க்கப்படுகிறது.இதேபோல், மேற்கு வங்காளத்தில் நடைபெற்ற முதற்கட்ட வாக்குப்பதிவிலும் 44,376 வாக்குச்சாவடிகளில் எதிலும் மறுவாக்குப்பதிவு பரிந்துரைக்கப்படவில்லை என்று தேர்தல் ஆணையம் தெரிவித்துள்ளது.இரு மாநிலங்களிலும் வாக்குப்பதிவு அமைதியாகவும், எந்தவித பெரிய முறைகேடுகளும் இன்றியும் நடைபெற்றுள்ளது.
தேர்தல் ஆணையத்தின் தீவிர கண்காணிப்பு, பாதுகாப்பு ஏற்பாடுகள் மற்றும் வாக்காளர்களின் ஒத்துழைப்பு ஆகியவற்றின் விளைவாக அமைந்துள்ளதாக தேர்தல் ஆணைய அதிகாரிகள் கருதுகின்றனர்.தமிழ்நாட்டில் 85.15% என்ற உயர் வாக்குப்பதிவு சதவீதத்துடன், வரலாற்று சிறப்புமிக்க தேர்தலாக இது பதிவாகியுள்ள நிலையில், எந்த வாக்குச்சாவடியிலும் மறுவாக்குப்பதிவு தேவைப்படாதது மேலும் சிறப்பை அளிக்கிறது.
மேலும், தேர்தல் ஆணையம், வாக்குப்பதிவு சுமூகமாக நடைபெற்றதற்கு வாக்காளர்கள், அரசியல் கட்சிகள், பாதுகாப்புப் படையினர் மற்றும் தேர்தல் பணியாளர்கள் அனைவருக்கும் நன்றி தெரிவித்துள்ளது.