ஜாலிஸ்கோ : FIFA உலகக் கோப்பை 2026 தொடரில் மெக்சிகோ அணி தொடர்ந்து இரண்டாவது வெற்றியை பதிவு செய்து நாக்அவுட் சுற்றுக்கு முன்னேறிய முதல் அணியாக சாதனை படைத்துள்ளது. குவாடலஜாராவில் நடைபெற்ற குரூப் A போட்டியில் தென் கொரியாவை 1-0 என்ற கோல் கணக்கில் வீழ்த்திய மெக்சிகோ, சொந்த ரசிகர்கள் முன்னிலையில் மறக்க முடியாத வெற்றியை பெற்றது.
போட்டியின் முதல் பாதி இரு அணிகளும் எச்சரிக்கையுடன் விளையாடியதால் கோல் எதுவும் பதிவாகவில்லை. ஆனால் இரண்டாவது பாதி தொடங்கிய சில நிமிடங்களிலேயே போட்டியின் திருப்புமுனை நிகழ்ந்தது.
50வது நிமிடத்தில் தென் கொரியா கோல்கீப்பர் கிம் சியுங்-க்யூ மற்றும் பாதுகாப்பு வீரர் லீ கி-ஹியுக் இடையே ஏற்பட்ட குழப்பம் மெக்சிகோவுக்கு சாதகமாக அமைந்தது. கைகளில் இருந்த பந்து கீழே நழுவிய நிலையில், லூயிஸ் ரோமோ அதனை எளிதாக கோலாக மாற்றி மெக்சிகோவுக்கு முன்னிலை பெற்றுக் கொடுத்தார்.
அதன்பிறகு சமநிலை கோலுக்காக தென் கொரியா கடுமையாக போராடியது. குறிப்பாக 87வது நிமிடத்தில் சோ க்யூ-சுங் அடித்த ஹெடர் மற்றும் அதனைத் தொடர்ந்து யாங் ஹியூன்-ஜுன் அடித்த முயற்சியை மெக்சிகோ கோல்கீப்பர் ரவுல் ரேங்கல் அபாரமாக தடுத்து அணியை காப்பாற்றினார்.
இந்த வெற்றியின் மூலம் இரண்டு போட்டிகளில் 6 புள்ளிகளை பெற்றுள்ள மெக்சிகோ, குரூப் A பிரிவில் முதலிடத்தை உறுதி செய்ததுடன் நாக்அவுட் சுற்றுக்கும் தகுதி பெற்றுள்ளது. 2022 உலகக் கோப்பையில் லீக் சுற்றிலேயே வெளியேறிய மெக்சிகோ, இந்த முறை சொந்த மண்ணில் வலுவான கம்பேக் கொடுத்துள்ளது.
மறுபுறம், தென் கொரியாவின் நட்சத்திர வீரர் சோன் ஹியூங்-மின் தொடர்ந்து இரண்டாவது போட்டியிலும் தாக்கத்தை ஏற்படுத்த முடியாமல் ஏமாற்றமளித்தார். 57வது நிமிடத்தில் அவர் மாற்று வீரராக வெளியேற்றப்பட்டார்.
மெக்சிகோ தனது கடைசி லீக் போட்டியில் Czechia அணியை எதிர்கொள்ள உள்ளது. அதேசமயம் தென் கொரியா, அடுத்த சுற்று வாய்ப்பை தக்கவைக்க தென்னாப்பிரிக்காவுக்கு எதிரான போட்டியில் வெற்றி பெற வேண்டிய கட்டாயத்தில் உள்ளது. சொந்த ரசிகர்களின் ஆதரவும், ஒற்றுமையான ஆட்டமும் மெக்சிகோ அணியை இந்த உலகக் கோப்பையில் முக்கிய அணிகளில் ஒன்றாக மாற்றியுள்ளது.