சென்னை : தமிழகத்தில் அண்மையில் நடைபெற்ற அரசியல் நகர்வுகளின் தொடர்ச்சியாக, தவெக ஆட்சியமைக்கப் பெரும்பான்மை இல்லாதபோது ஆட்சி அமைப்பதற்காகப் பாஜக உள்ளிட்ட பலரிடமும் ஆதரவு கோரியது எனப் பாஜக மூத்த தலைவர் நயினார் நாகேந்திரன் கூறியிருந்த குற்றச்சாட்டு பெரும் பரபரப்பைக் கிளப்பியது. இந்த நிலையில், கோவையில் செய்தியாளர்களைச் சந்தித்த தமிழக அமைச்சர் செங்கோட்டையன், நயினார் நாகேந்திரனின் இந்த பேச்சுக்குக் கடுமையான மறுப்பையும் விளக்கத்தையும் அளித்துள்ளார்.
ஆட்சி அமைப்பதற்காக நாங்கள் பாஜகவிடம் எந்தவொரு உதவியையும், ஆதரவையும் என்றைக்கும் கேட்டது கிடையாது என்று அமைச்சர் செங்கோட்டையன் மிகத் திட்டவட்டமாக மறுப்புத் தெரிவித்துள்ளார்.
தவெக ஆட்சி அமைவதற்குப் பாஜக உதவி செய்ய வேண்டும் என்று எங்களது தரப்பில் இருந்து யாரிடமும், எந்தக் காலத்திலும் ஆதரவு கோரப்படவில்லை என்பதைத் தெளிவுபடுத்திய அவர், நயினார் நாகேந்திரன் எப்போதுமே ஒரு காமெடி போலப் பேசக்கூடியவர் என்றும், அவருடைய இத்தகையப் பேச்சுக்கெல்லாம் தான் பதில் சொல்ல வேண்டிய அவசியமே இல்லை என்றும் சுட்டிக்காட்டியுள்ளார்.
நயினார் நாகேந்திரன் வேண்டுமென்றே தவெக-வை நோக்கித் தாக்குதல் நடத்துகிறாரே தவிர, அவர் உண்மையில் தாக்க வேண்டியது தங்களைத் தொடர்ந்து தாக்கி வரும் திராவிட முன்னேற்றக் கழகத்தைத்தான் என்றும் அவர் குறிப்பிட்டுள்ளார்.
பாஜகவிற்கும் திமுகவிற்கும் இடையேதான் தற்பொழுது சமரச முயற்சிகள் திரைமறைவில் நடந்து கொண்டிருக்கின்றன என்று விமர்சித்த அமைச்சர் செங்கோட்டையன், நயினார் நாகேந்திரன் ஆட்சியில் இருந்தபோது சொந்தமாக மருத்துவக் கல்லூரி உருவாக்குவதற்காக அரசிடம் விண்ணப்பம் போட்டு நின்றவர் என்றும், அப்படிப்பட்டவர் தற்பொழுது தவெக மீது இப்படியொரு ஆதாரமற்ற குற்றச்சாட்டை வைப்பது அழகல்ல என்றும் சாடியுள்ளார்.
தேர்தல் முடிந்து ஆட்சி அமைந்ததற்குப் பிறகு, ஒரு மாநிலத்தின் பிரதிநிதியாக டெல்லிக்குச் சென்று நாட்டின் குடியரசுத் தலைவர், துணைத் தலைவர், பாரதப் பிரதமர், மத்திய உள்துறை அமைச்சர் மற்றும் நிதி அமைச்சர் உள்ளிட்ட எல்லோரையும் நேரில் சந்திப்பது என்பது இயற்கையான ஒரு நிர்வாக நடைமுறைதான் என்றும்; அதைப்போய் ஆட்சி அமைக்க ஆதரவு கேட்டதாகத் திரித்துப் பேசுவது முற்றிலும் தவறு என்றும் அமைச்சர் செங்கோட்டையன் தனது கோயம்புத்தூர் பேட்டியில் விளக்கமளித்துள்ளார்.