சென்னை :மாநகராட்சி தூய்மைப் பணியாளர்களுக்கு தினசரி மூன்று வேளை உணவும் இலவசமாக வழங்கும் புதிய திட்டத்தை வரும் நவம்பர் 15-ஆம் தேதி முதல் தமிழக முதலமைச்சர் மு.க. ஸ்டாலின் தொடங்கி வைக்க உள்ளார் என்று சென்னை மாநகராட்சி மேயர் ஆர். பிரியா அதிகாரப்பூர்வமாக அறிவித்துள்ளார். இந்தத் திட்டம் சென்னை மாநகராட்சியில் பணியாற்றும் ஆயிரக்கணக்கான தூய்மைப் பணியாளர்களின் வாழ்க்கைத் தரத்தை மேம்படுத்தும் நோக்கில் கொண்டுவரப்பட்டுள்ளது.
தூய்மைப் பணியாளர்கள் காலை, மதியம், இரவு என மூன்று வேளையும் சத்தான உணவு பெறுவதை உறுதி செய்யும் இந்தத் திட்டம் மாநகராட்சியின் முக்கிய மக்கள் நலத் திட்டங்களில் ஒன்றாகும். இந்தத் திட்டத்திற்காக சென்னை மாநகராட்சி பல்வேறு ஏற்பாடுகளை செய்து வருகிறது. தூய்மைப் பணியாளர்கள் பணியிடத்திலேயே உணவு வழங்கப்படும் வகையில் சமையல் ஏற்பாடுகள், உணவு விநியோகம் உள்ளிட்டவை தயார் நிலையில் உள்ளன.
மேயர் பிரியா கூறுகையில், “தூய்மைப் பணியாளர்கள் சென்னையை சுத்தமாக வைத்திருப்பவர்கள். அவர்களது உழைப்புக்கு அங்கீகாரம் அளிக்கும் வகையில் இந்த உணவுத் திட்டம் அமல்படுத்தப்படுகிறது” என்றார். இதன்மூலம் பணியாளர்களின் ஊட்டச்சத்து மேம்பட்டு, உடல்நலம் பாதுகாக்கப்படும் என்று எதிர்பார்க்கப்படுகிறது.பருவமழையை எதிர்கொள்ளும் வகையில் சென்னை மாநகராட்சி முன்னெச்சரிக்கை ஏற்பாடுகளை மேற்கொண்டு வருவதாகவும் மேயர் பிரியா தெரிவித்தார்.
மேலும், மழைநீர் வடிகால் பணிகள், தேங்கிய நீர் அகற்றுதல், மரங்கள் வெட்டுதல் உள்ளிட்ட பணிகள் தீவிரமாக நடக்கின்றன. கூடுதலாக சமுதாய நலக் கூடங்கள் அமைக்கப்பட்டு வருவதாகவும், மழைக்காலத்தில் பாதிக்கப்படும் மக்களுக்கு தங்குமிடம், உணவு வழங்க ஏற்பாடு செய்யப்பட்டுள்ளதாகவும் கூறினார். முதலமைச்சர் மு.க. ஸ்டாலின் நவம்பர் 15-ஆம் தேதி நேரில் சென்று உணவுத் திட்டத்தைத் தொடங்கி வைப்பார் என்று அறிவிக்கப்பட்டுள்ளது. இது தூய்மைப் பணியாளர்கள் மத்தியில் பெரும் மகிழ்ச்சியை ஏற்படுத்தியுள்ளது.