காமராஜர், பெரியார், அம்பேத்கர்.., தவெக மாநாட்டில் அஞ்சலையம்மாள், வேலு நாச்சியாருக்கு கட் அவுட்.?

சென்னை : தமிழக வெற்றிக் கழக கட்சியின் முதல் மாநில மாநாடு வரும் அக்டோபர் மாதம் 27ஆம் தேதி நடைபெற உள்ளது. மாநாடு நடைபெறும் விழுப்புரம் மாவட்டம் விக்கிரவாண்டியில் இதற்கான ஏற்பாடுகள் முழுவீச்சில் நடைபெறுகிறது.  அங்கு மட்டுமல்லாமல் மாநிலத்தில் பல்வேறு இடங்களில் மாநாட்டுக்கான கட் அவுட்கள், பேனர்கள், அழைப்புகள் என தவெக தொண்டர்கள் தீவிரமாக வேலை செய்து வருகின்றனர்.

நேற்று, மாநாடு நடைபெறும் இடத்தில் பிரமாண்ட கட் அவுட்கள் அமைக்கப்பட்ட புகைப்படங்கள் வெளியாகின. அதில், முதலில் கர்மவீரர் காமராஜர் அடுத்து தந்தை பெரியார் , 3வதாக தவெக தலைவர் விஜய், அடுத்து அண்ணல் அம்பேத்கர் ஆகியோரது 75 அடி உயர பிரமாண்ட கட் அவுட்கள் நிறுவப்பட்டுள்ளன.

அதே போல பெண் தலைவர்களுக்கு மரியாதை செலுத்தும் விதமாக பெண் ஆளுமைகள் கட் அவுட்கள் இடம் பெற உள்ளதாக தற்போது தகவல்கள் வெளியாகியுள்ளன. அதன்படி, தென்னகத்து ஜான்சி ராணி என மகாத்மா காந்தியடிகளால் அழைக்கப்பெற்ற சுதந்திர போராட்ட தியாகி அஞ்சலையம்மாள் கட் அவுட்டும், சுதந்திர போராட்ட வீரமங்கை வேலு நாச்சியார் கட் அவுட்டும் இடம் பெற உள்ளதாக தகவல்கள் வெளியாகியுள்ளன.

முன்னதாக காமராஜர், பெரியார், அம்பேத்கர் கட்அவுட்கள் வைக்கப்பட்டதற்கே ஒரு சில விமர்சனங்களை இணையத்தின் வாயிலாக எதிர்கொண்டு வருகிறார் தவெக தலைவர் விஜய். அம்பேத்கருக்கு முன்னால் விஜய் கட் அவுட் இருக்கிறது, அறிஞர் அண்ணா கட் அவுட் இல்லை போன்ற விமர்சனங்கள் எழுந்தது. அரசியல் களத்தில் இறங்கியுள்ள விஜய் இதனையெல்லாம் எப்படி எதிர்கொள்கிறார் என்பதை பொறுத்திருந்து பார்க்கலாம்.