அதிக கட்டண வசூல்.! ஆம்னி பேருந்துகளுக்கு ரூ.92,500 அபராதம்.!

அதிக கட்டணம் வசூலித்ததாக 49 ஆம்னி பேருந்துகளுக்கு 92,500 ரூபாய் அபராதம் விதிக்கப்பட்டது. 

விடுமுறை காலம் வந்தாலே, தனியார் பேருந்துகள் அதிக கட்டணம் வசூலிக்கக் கூடாது என போக்குவரத்துத் துறை தனியார் பேருந்துகளுக்கு அறிவுறுத்த ஆரம்பித்து விடும். அதையும் மீறி ஒரு சில தனியார் பேருந்துகள் அதிக கட்டணம் வசூலிப்பது தொடர்கதையாக இருந்து தான் வருகிறது.

இந்நிலையில், கடந்த வாரம் கிறிஸ்துமஸ் விடுமுறை தொடங்கியதும் விடுமுறைக்கு பலரும் தங்கள் சொந்த ஊருக்கு புறப்பட்டனர். அவர்களுக்கு தனியார் பேருந்துகளில் அதிக கட்டணம் வசூலிக்கப்படுகிறதா என சென்னையில் கோயம்பேடு, போரூர் ஆகிய பகுதிகளில் போக்குவாரத்து துறை அதிகாரிகள் சோதனை செய்தனர்.

கடந்த 23ஆம் தேதி முதல் இந்த சோதனை நடைபெற்று வருகிறது. அதில் தற்போது வரை பயணிகளிடம் அதிக கட்டணம் வசூலித்தது, ஆவணங்களை புதுப்பிக்காமல் வைத்திருப்பது உள்ளிட்ட புகார்களின் அடிப்படியையில் 49ஆம்னி பேருந்துகளுக்கு 92,500 ரூபாய் அபராதம் வசூலிக்கப்பட்டது.

இதில் அதிக கட்டணம் செலுத்திய பயணிகளுக்கு 9,200 ரூபாய் திருப்பி கொடுக்கப்பட்டது. இன்னும் விடுமுறை இருப்பதால், வரும் ஜனவரி 2ஆம் தேதி வரை தொடரும் எனவும் போக்குவரத்து துறை தெரிவித்துள்ளது.