ரூ 1,00,00,000 மதிப்பிலான 25,000 லிட்டர் எரிசாராயம் கடத்தல்….கேரளா_வுக்கு கடத்த முயன்ற போது பறிமுதல்..!!

சத்தீஸ்கரில் இருந்து கேரளாவிற்கு டேங்கர் லாரியில் கடத்திச் செல்லப்பட்ட ஒரு கோடி ரூபாய் மதிப்பிலான 25 ஆயிரம் லிட்டர் எரிசாராயம் பறிமுதல் செய்யப்பட்டது.

வட மாநிலத்தில் இருந்து தமிழகம் வழியாக கேரளாவிற்கு எரிசாராயம் கடத்தி செல்லப்படுவதாக மதுவிலக்கு அமலாக்கத் துறைக்கு ரகசிய தகவல் கிடைத்தது. இதனடிப்படையில் நாமக்கல் மாவட்ட மதுவிலக்கு பிரிவு போலீசார் சேலம் – கரூர் தேசிய நெடுஞ்சாலையில் வாகன சோதனையில் ஈடுபட்டனர்.

அப்போது அவ்வழியாக வந்த டேங்கர் லாரியை சோதனையிட்ட போது, ரகசிய அறை அமைத்து 25 ஆயிரம் லிட்டர் எரிசாராயம் கடத்திச் சென்றது கண்டுபிடிக்கப்பட்டது. ஓட்டுனரிடம் நடத்திய விசாரணையில், கேரளாவில் மதுபானங்களுக்கு தடை விதிக்கப்பட்டுள்ள நிலையில், கள்ளச்சாராயம் தயாரிப்பதற்காக, சத்தீஸ்கரில் இருந்து எரிசாராயத்தை கடத்திச்சென்றதும் தெரியவந்தது.

டேங்கர் லாரியை பறிமுதல் செய்த போலீசார், ஓட்டுனரை கைது செய்து விசாரணை நடத்தி வருகின்றனர். இந்நிலையில் பறிமுதல் செய்யப்பட்ட எரிசாராயத்தின் மதிப்பு சுமார் ஒரு கோடி ரூபாய் இருக்கும் எனவும் தெரிவிக்கப்பட்டுள்ளது.