சென்னை :தமிழ் சினிமாவின் முன்னணி நடிகரான அஜித் குமார், கரூர் கூட்ட நெரிசல் சம்பவத்திற்கு பொறுப்பு ஒருவருக்கு மட்டும் இல்லை என்று தெளிவுபடுத்தி, சமூகத்தின் கூட்ட மோகத்தை கடுமையாக விமர்சித்துள்ளார். அக்டோபர் 31 அன்று, தி ஹாலிவுட் ரிப்போர்டர் இந்தியாவின் ‘ஃப்ரண்ட் ரோ’ நிகழ்ச்சியில் அளித்த பேட்டியில், அவர் இது குறித்து கேட்கப்பட்ட கேள்விக்கு பதில் அளித்தார்.
இது குறித்து பேசிய அவர் “அஜித் “நான் யாரையும் குறை சொல்ல விரும்பவில்லை. கரூர் சம்பவத்திற்கு ஒருவர் மட்டும் பொறுப்பல்ல. நாம் அனைவருக்கும், அதில் பங்கு உண்டு” என்று கூறினார். இந்த சம்பவத்தில் 41 பேர் உயிரிழந்ததை அவர் துரதிர்ஷ்டமாகக் கருதி, சமூகம் முழுமையாக பொறுப்பேற்க வேண்டும் என்று வலியுறுத்தினார். மேலும், அஜித், கூட்டம் திரட்டுவதை பெரிய விஷயமாக்குவதை நிறுத்த வேண்டும் என்று கூறி, “கிரிக்கெட்டில் கூட்டம் கூடினாலும் இப்படி நடப்பதில்லை.
தியேட்டரில் முதல் நாள் முதல் காட்சி, பிரபலங்கள் கலந்துகொள்ளும் நிகழ்வுகளில் மட்டும் ஏன் இப்படி?” என்று கேள்வி எழுப்பினார். இது நம் திரையுலகை உலகளவில் தவறாகக் காட்டுகிறது என்று அவர் விமர்சித்தார். ரசிகர்களின் அன்புக்காகவே நடிகர்களான நாங்கள் உழைக்கிறோம் என்று கூறிய அவர், “உயிரைப் பணயம் வைத்து அன்பு காட்ட வேண்டாம். அன்பை காட்ட வேறு வழிகள் உண்டு” என்று ரசிகர்களை அறிவுறுத்தினார். முதல் நாள் முதல் காட்சி கலாச்சாரத்தை நாம் ஆதரிக்கக் கூடாது என்று அவர் வலியுறுத்தினார்.
மேலும், அஜித், ஊடகங்களும் பொறுப்புடன் இருக்க வேண்டும் என்று கூறி, கூட்டத்தை பெரிதுபடுத்தி செய்தி வெளியிடுவதைத் தவிர்க்க வேண்டும் என்று கோரினார். “நாம் சமூகமாக கூட்டத்திற்கு மோகம் கொண்டிருக்கிறோம். அது படத்துலகை கெட்ட பிம்பத்திற்கு தள்ளுகிறது” என்று அவர் சுட்டிக்காட்டினார். முடிவாக, அஜிதின் இந்த அறிக்கை, கரூர் சம்பவத்திற்கு பொறுப்பு அனைவருக்கும் உண்டு என்று உணர்த்தியுள்ளது.