இது தான் நிஜ ஐபிஎல்! மும்பை கோட்டையில் கொடியை பறக்கவிடுமா சென்னை?

ஐபிஎல் 2024 : இன்று நடைபெறும் ஐபிஎல் போட்டியில் சென்னை அணியும் மும்பை இந்தியன்ஸ் அணியும் மோதுகிறது.

ஐபிஎல் போட்டி என்றாலே சிறியவர்கள் முதல் பெரியவர்கள் வரை அனைவரும் விரும்பி பார்ப்பார்கள். அதிலும் சென்னை மற்றும் மும்பை அணிகள் மோதும் போட்டி என்றால் அதற்கென்று தனி ரசிகர்கள் கூட்டமே இருக்கும் என்றே கூறலாம். ஐபிஎல் போட்டிகளில் எல் கிளாசிக்கோ என்று அழைக்கப்படும் இந்த போட்டியை தான் எல்லா அணி ரசிகர்களும் விரும்பி பார்ப்பார்கள்.

அந்த அளவிற்கு சென்னை – மும்பை மோதும் போட்டி என்றாலே எதிர்ப்ப்புகள் அதிகமாக எழுந்துவிடும். இரண்டு அணிகளும் இதுவரை 5 முறை கோப்பைகளை வென்று அதிகமுறை கோப்பைகளை வென்ற அணிகளாக இருந்து வருகிறது. இந்த சீசனில் முதன் முறையாக இன்று இரவு 7 மணிக்கு மும்பை வான்கடே மைதானத்தில்  நடைபெறும் போட்டியில் மும்பை அணியை சென்னை எதிர்கொள்ள இருக்கிறது.

நேருக்கு நேர் 

இந்த போட்டிக்கு முன்னதாக இதுவரை சென்னை சூப்பர் கிங்ஸ் அணியும், மும்பை இந்தியன்ஸ் அணியும் 36 போட்டிகளில் நேருக்கு நேராக மோதியுள்ளது. இதில் 16 முறை சென்னை அணியும், 20 முறை மும்பை அணியும் வெற்றிபெற்றுள்ளது. அதைப்போல இந்த இரண்டு அணிகளும் வான்கடே மைதானத்தில் 12 போட்டிகள் விளையாடி இருக்கிறது. இதிலும் 7 முறை மும்பை அணி தான் வெற்றிபெற்றுள்ளது. 5 முறை மட்டுமே சென்னை வெற்றிபெற்றுள்ளது.

இந்த சீசனில் சென்னை சூப்பர் கிங்ஸ் அணி 5 போட்டிகள் விளையாடி 3 போட்டிகளில் வெற்றிபெற்று புள்ளிவிவரப்பட்டியலில் 3-வது இடத்தில் உள்ளது. அதைப்போல மும்பை அணி 5 போட்டிகள் விளையாடி 2 போட்டியில் மட்டுமே வெற்றிபெற்று 7-வது இடத்தில் உள்ளது. எனவே, இன்று நடைபெறும் போட்டியில் கண்டிப்பாக வெற்றிபெற்று புள்ளி விவரப்பட்டியலில் முன்னுக்கு செல்லவேண்டும் என்ற முனைப்புடன் இரண்டு அணிகளும் களம் காண்கிறது.

விளையாட எதிர்பார்க்கப்படும் வீரர்கள் 

மும்பை இந்தியன்ஸ் 

ரோஹித் சர்மா , இஷான் கிஷன் (விக்கெட் கீப்பர் ), திலக் வர்மா, ஹர்திக் பாண்டியா (கேப்டன்), டிம் டேவிட், ரொமாரியோ ஷெப்பர்ட், முகமது நபி, ஷ்ரேயாஸ் கோபால், ஜஸ்பிரித் பும்ரா, ஜெரால்ட் கோட்ஸி.

சென்னை சூப்பர் கிங்ஸ் 

ருதுராஜ் கெய்க்வாட் (கேப்டன்), ரச்சின் ரவீந்திரா, அஜிங்க்யா ரஹானே, டேரில் மிட்செல், சமீர் ரிஸ்வி, ரவீந்திர ஜடேஜா, எம்எஸ் தோனி (விக்கெட் கீப்பர்), ஷர்துல் தாக்கூர், தீபக் சாஹர், முஸ்தபிசுர் ரஹ்மான், துஷார் தேஷ்பாண்டே.