வாஷிங்டன் : ரஷ்யாவிடமிருந்து தொடர்ந்து கச்சா எண்ணெய் மற்றும் இயற்கை எரிவாயுவை இறக்குமதி செய்யும் இந்தியா மற்றும் சீனா உள்ளிட்ட நாடுகளின் மீது 100 சதவீதம் வரை கூடுதல் இரண்டாம் நிலை வரிகளை (Secondary Tariffs) விதிக்க வழிவகை செய்யும் புதிய மசோதா, அமெரிக்க செனட் சபையில் நடைபெற்ற நடைமுறை வாக்கெடுப்பில் (Procedural Vote) பெரும் ஆதரவுடன் நிறைவேறி சட்டமாக மாறுவதற்கான முதல் படியை எட்டியுள்ளது.
உக்ரைன் மீது ரஷ்யா நடத்திவரும் போரைக் முடிவுக்குக் கொண்டுவரும் முயற்சியாகவும், போருக்கான நிதியாதாரங்களைத் திரட்ட உதவும் ரஷ்யாவின் எரிபொருள் வருவாயைக் கடுமையாகக் குறைக்கும் நோக்கத்துடனும் இந்த அதிரடி நடவடிக்கை எடுக்கப்பட்டுள்ளது. உக்ரைன் அதிபர் செலென்ஸ்கி வாஷிங்டனுக்கு மேற்கொண்ட பயணத்தின் போது முன்னெடுக்கப்பட்ட இந்த மசோதாவிற்கு, அமெரிக்காவின் ஆளுங்கட்சி மற்றும் எதிர்க்கட்சியான இரு கட்சிகளின் (Bipartisan support) வலுவான ஆதரவு கிடைத்துள்ளது.
மறைந்த புகழ்பெற்ற ரிபப்ளிகன் செனட்டர் லிண்ட்சே கிராகம் (Lindsey Graham) மற்றும் டெமாக்ரடிக் செனட்டர் ரிச்சர்ட் ப்ளூமென்டல் ஆகியோரால் வடிவமைக்கப்பட்ட 'The Lindsey O. Graham Sanctioning Russia and Iran Act of 2026' என்ற இந்த மசோதாவின் பிரதான அம்சங்கள் பற்றிய விவரங்கள் கீழே கொடுக்கப்பட்டுள்ளது.
கடும் வரிகள் மற்றும் இலக்குகள்: ரஷ்யாவிடம் இருந்து அதிக அளவில் கச்சா எண்ணெய் வாங்கும் உலகின் முதல் ஐந்து முக்கிய நாடுகளாகக் கருதப்படும் இந்தியா, சீனா மற்றும் சில நாடுகளின் இறக்குமதிகள் மீது 100 சதவீதம் வரை கூடுதல் வரிகளை விதிக்க இது வழிவகுக்கிறது.
ரஷ்யப் பொருளாதாரம் மீது முழுத் தடை: இந்த மசோதாவானது வெறும் வரிவிதிப்புடன் நின்றுவிடாமல், ரஷ்யாவின் எரிசக்தி துறை, நிதி நிறுவனங்கள், பாதுகாப்புத் தளவாடத் துறைகள் மற்றும் அந்நாட்டு அதிபர் விளாடிமிர் புடின் உள்ளிட்ட முக்கிய பிரமுகர்கள் மீது முழுமையான பொருளாதாரத் தடைகளையும் விதிக்கிறது.
அமெரிக்க செனட் சபையில் நடைபெற்ற இந்த ஆரம்பகட்ட வாக்கெடுப்பில் மசோதாவிற்கு ஆதரவாகப் பெரும்பான்மையான வாக்குகள் பதிவாகி வெற்றி பெற்றுள்ள நிலையில், இது தொடர்பான அடுத்தடுத்த கட்ட விவாதங்களும் இறுதி ஒப்புதல்களும் விரைவில் நடைபெறும் என எதிர்பார்க்கப்படுகிறது. அமெரிக்காவின் இந்த நடவடிக்கையானது சர்வதேச வர்த்தகச் சந்தையிலும், இந்தியா - சீனா உள்ளிட்ட முக்கிய நாடுகளின் எரிசக்தி இறக்குமைக் கொள்கைகளிலும் கடுமையான தாக்கங்களை ஏற்படுத்தக்கூடும் எனப் பொருளாதார வல்லுநர்கள் கருதுகின்றனர்.