ஹோர்முஸ் நீரிணையை திறக்க ஈரான் சம்மதம்...போரை நிறுத்திய டிரம்ப்!

வாஷிங்டன் : அமெரிக்க அதிபர் டொனால்ட் டிரம்ப், ஈரானின் எரிசக்தி உள்கட்டமைப்புகள் மற்றும் பாலங்களைத் தாக்கி “முழு நாகரிகத்தையும் அழித்துவிடுவேன்” என்று கொடுத்த 8 மணி (இரவு) காலக்கெடுவுக்கு சரியாக 90 நிமிடங்களுக்கு முன்பு, தாக்குதலை இரண்டு வாரங்களுக்கு ஒத்திவைப்பதாக அறிவித்தார்.

சமூக ஊடகத்தில் டிரம்ப் வெளியிட்ட பதிவில், “ஈரான் உடனடியாக, முழுமையாகவும் பாதுகாப்பாகவும் ஹார்மூஸ் நீரிணையைத் திறக்க ஒப்புக்கொண்டால், ஈரானுக்கு எதிரான தாக்குதலை இரண்டு வாரங்களுக்கு நிறுத்துகிறேன்” என்று தெரிவித்தார். மேலும், “நாங்கள் ஏற்கனவே அனைத்து ராணுவ இலக்குகளையும் எட்டியுள்ளோம். ஈரானுடன் நீண்டகால அமைதி ஒப்பந்தம் குறித்து மிக முக்கியமான உடன்பாட்டை நோக்கி முன்னேறியுள்ளோம்” என்றும் அவர் கூறினார்.

டிரம்ப் தனது முடிவு பாகிஸ்தான் பிரதமர் ஷெஹ்பாஸ் ஷரீப் மற்றும் ராணுவத் தலைவர் ஜெனரல் ஆசிம் முனீர் ஆகியோரின் வேண்டுகோளுக்கு இணங்க எடுக்கப்பட்டதாகத் தெரிவித்தார். பாகிஸ்தான் இந்தப் பிரச்சினையில் அமெரிக்கா மற்றும் ஈரான் இடையே முக்கிய மத்தியஸ்தராக செயல்பட்டு வருகிறது.

பாகிஸ்தான் பிரதமர் ஷெஹ்பாஸ் ஷரீப், “அமைதியான தீர்வுக்கான இராஜதந்திர முயற்சிகள் சீராக முன்னேறி வருகின்றன. அதிபர் டிரம்ப் இரண்டு வார காலக்கெடுவை நீட்டிக்க வேண்டும் என்று நான் மனமார வேண்டுகிறேன்” என்று சமூக ஊடகத்தில் பதிவிட்டிருந்தார்.

டிரம்ப் அறிவித்த பிறகு ஷரீப் மேலும் ஒரு அறிக்கையில், அமெரிக்கா மற்றும் ஈரான் பிரதிநிதிகளை வெள்ளிக்கிழமை இஸ்லாமாபாத்துக்கு அழைத்துள்ளதாகவும், அங்கு அனைத்து பிரச்சினைகளுக்கும் இறுதி உடன்பாடு காண பேச்சுவார்த்தை நடைபெறும் என்றும் தெரிவித்தார். இந்த போர் நிறுத்தம் லெபனானையும் உள்ளடக்கும் என்று அவர் கூறினார்.

மேலும், ஈரான் வெளியுறவு அமைச்சர் அப்பாஸ் அராக்சி, உச்ச தேசிய பாதுகாப்பு கவுன்சில் சார்பில் அறிக்கை வெளியிட்டார். “பாகிஸ்தானின் வேண்டுகோளுக்கும், டிரம்ப் ஈரானின் 10 அம்ச முன்மொழிவின் பொதுக் கட்டமைப்பை ஏற்றுக்கொண்டதற்கும் இணங்க, ஈரானுக்கு எதிரான தாக்குதல்கள் நிறுத்தப்பட்டால், எங்கள் பலமிக்க ராணுவம் தற்காப்பு நடவடிக்கைகளை நிறுத்தும்” என்று தெரிவித்தார்.மேலும், “இரண்டு வாரங்களுக்கு ஹார்மூஸ் நீரிணையில் பாதுகாப்பான போக்குவரத்து ஈரான் ராணுவத்துடன் ஒருங்கிணைப்புடன் சாத்தியமாகும்” என்றும் அவர் கூறினார்.

இஸ்ரேல் எச்சரிக்கை

இஸ்ரேல் பிரதமர் பெஞ்சமின் நெதன்யாகு, டிரம்பின் முடிவை வரவேற்றார். ஆனால் “இந்த போர் நிறுத்தம் லெபனானை உள்ளடக்காது” என்று தெளிவுபடுத்தினார். ஈரான் மீதான அழுத்தத்தைத் தொடர்ந்து வைத்திருக்க வேண்டும் என்றும், ஈரான் அணு ஆயுதம், ஏவுகணை மற்றும் பயங்கரவாத அச்சுறுத்தலை இல்லாமல் செய்ய வேண்டும் என்றும் அவர் வலியுறுத்தினார்.