சென்னை :தமிழ்நாடு அரசு, கலைஞர் மகளிர் உரிமைத் திட்டத்தில் பெண்களுக்கு கோடைக்கால சிறப்புத் தொகையாக ரூ.2,000 வழங்கியது பெரும் வரவேற்பைப் பெற்றது. இதைத் தொடர்ந்து, சமூகத்தின் விளிம்புநிலையில் வாழும் முதியோர், கைம்பெண்கள், வயது முதிர்ந்த திருநங்கையர், மாற்றுத்திறனாளிகள் உள்ளிட்டோருக்கும் இதேபோன்ற சிறப்பு நிதி வழங்க வேண்டும் என்ற கோரிக்கைகள் பலமாக எழுந்தன.
முதலமைச்சர் மு.க. ஸ்டாலின் இக்கோரிக்கைகளை நம்பிக்கையுடன் ஏற்று, இன்று (மார்ச் 3, 2026) நிறைவேற்றியுள்ளார். “நலிவு நிலை போக்கும் சிறப்பு நிதி” என்ற பெயரில் ரூ.2,000-ஐ மார்ச் மாத ஓய்வூதியத்துடன் சேர்த்து வங்கிக் கணக்கில் வரவு வைக்கப்பட்டுள்ளது. இது பயனாளிகளுக்கு மிகுந்த நிவாரணமாக அமைந்துள்ளது. இதன்படி, பல்வேறு சமூகப் பாதுகாப்புத் திட்டங்களின் கீழ் பயன்பெறும் முதியோர், கைம்பெண்கள் உள்ளிட்டோர் மொத்தம் 29 இலட்சத்து 29 ஆயிரம் பயனாளிகளுக்கு தலா ரூ.3,200-ம், 5 இலட்சத்து 92 ஆயிரம் மாற்றுத்திறனாளிகளுக்கு தலா ரூ.3,500-ம், பராமரிப்பு உதவித்தொகை பெறும் 2 இலட்சத்து 58 ஆயிரம் மாற்றுத்திறனாளிகளின் குடும்பங்களுக்கு தலா ரூ.4,000-ம் இன்று காலை வழங்கப்பட்டுள்ளது.
மேலும், மீனவர் குடும்பங்களுக்கு ஏப்ரல் முதல் ஜூன் வரையிலான மீன்பிடித் தடைக்கால உதவித்தொகையாக குடும்பம் ஒன்றுக்கு ரூ.8,000 வீதம், மொத்தம் 1,62,900 குடும்பங்களுக்கு வழங்கப்பட்டு வருகிறது. இதேபோல், நீலகிரி மாவட்டத்தில் உள்ள 14,870 தேயிலை விவசாயிகள் பயன்பெறும் வகையில், 15 கூட்டுறவுத் தேயிலை தொழிற்சாலைகள் மூலம் கொள்முதல் செய்யப்பட்ட பசுந்தேயிலைக்கு கிலோவுக்கு ரூ.2 ஆதார விலையாக ரூ.8.53 கோடி நிதி வழங்கப்படுகிறது.
ஒட்டுமொத்தமாக, இந்த சிறப்பு நிதி அறிவிப்பு தமிழ்நாடு அரசின் “எல்லோருக்கும் எல்லாம்” என்ற கொள்கையை மீண்டும் நிரூபிக்கும் வகையில் அமைந்துள்ளது. விளிம்புநிலை மக்களின் கோரிக்கையை உடனடியாக நிறைவேற்றிய முதலமைச்சர் ஸ்டாலின், சமூக நீதி மற்றும் சமத்துவத்தை முன்னிலைப்படுத்தும் ஆட்சியாக திமுக அரசை மக்கள் மத்தியில் நிலைநிறுத்தியுள்ளார்.முதல்வர் மு.க.ஸ்டாலின் இதனை தனது எக்ஸ் வலைதளபக்கத்தில் அறிவித்துள்ளார்.