சென்னை :அண்ணா அறிவாலயத்தில் செப்டம்பர் 9, 2025 அன்று நடைபெற்ற திமுக மாவட்ட செயலாளர்கள் கூட்டத்தில் முதலமைச்சர் மு.க. ஸ்டாலின், 2026 சட்டமன்றத் தேர்தலில் வெற்றி பெறுவதற்கு தொண்டர்களும், நிர்வாகிகளும் முழு அர்ப்பணிப்புடன் உழைக்க வேண்டும் என்று அழைப்பு விடுத்தார். “நமது இலக்கு ஒன்றுதான் – 2026-ல் திராவிட மாடல் 2.0-ஐ தமிழ்நாட்டில் நிறுவ வேண்டும். இந்த வெற்றி திமுகவுக்கு மட்டுமல்ல, ஒட்டுமொத்த தமிழ்நாட்டு மக்களுக்கான வெற்றியாக இருக்கும்,” என்று அவர் தெரிவித்தார்.
மேலும், “தேர்தல் நாள் வரை பசி, தூக்கம், ஓய்வு ஆகியவற்றை மறந்து, உங்கள் உழைப்பை முழுமையாக அர்ப்பணிக்க வேண்டும். தமிழ்நாட்டின் மண், மொழி, மானத்தை காக்க நம்மால் மட்டுமே முடியும். இதற்காக, நான் உங்களிடம் ஒரே ஒரு கோரிக்கையை முன்வைக்கிறேன் – உழைப்பை கொடுங்கள்,” என்று ஸ்டாலின் உரையாற்றினார். திமுகவின் ஆட்சி, கடந்த நான்கு ஆண்டுகளில் மக்களுக்கு நலத்திட்டங்கள் மூலம் பயனளித்ததாகவும், இந்த வெற்றிகளை மேலும் மேம்படுத்த ‘திராவிட மாடல் 2.0’ என்ற புதிய தொலைநோக்கு திட்டத்தை அவர் அறிவித்தார்.
2026 தேர்தல் பிரச்சாரத்தை தீவிரப்படுத்தும் வகையில், செப்டம்பர் 20, 2025 அன்று தமிழ்நாடு முழுவதும் பொதுக்கூட்டங்கள் நடத்தப்படும் என்று ஸ்டாலின் அறிவித்தார். “இந்தப் பொதுக்கூட்டங்கள் மூலம், தமிழ்நாட்டு மக்களிடையே நமது கொள்கைகளையும், திராவிட மாடலின் சாதனைகளையும் எடுத்துச் செல்வோம். இந்த வெற்றி, தமிழ்நாட்டின் எதிர்காலத்தை உறுதிப்படுத்தும்,” என்று அவர் கூறினார்.
மேலும், திமுகவின் ஆட்சியில் மகளிர் மேம்பாடு, இளைஞர் வேலைவாய்ப்பு, கல்வி, மற்றும் உள்கட்டமைப்பு திட்டங்கள் மூலம் மாநிலம் முன்னேறி வருவதாகவும் அவர் வலியுறுத்தினார்.“நாம் ஒரு புரட்சிகரமான ஆட்சியை வழங்கி வருகிறோம். 2026-ல் மக்கள் மீண்டும் நம்மை ஆதரிப்பார்கள் என்ற நம்பிக்கை உள்ளது. ஆனால், இந்த வெற்றி தானாக வராது. ஒவ்வொரு தொண்டரும், நிர்வாகியும் மக்களோடு மக்களாக இணைந்து உழைக்க வேண்டும்,” என்று ஸ்டாலின் உரையில் வேண்டுகோள் விடுத்தார்.