சென்னை :2026 தமிழ்நாடு சட்டமன்றத் தேர்தலை முன்னிட்டு, நடிகர் விஜய் எந்தத் தொகுதியில் போட்டியிடுவார் என்ற எதிர்பார்ப்பு அரசியல் வட்டாரங்களில் பரவலாக பேசப்பட்டு வருகிறது. ஆரம்பத்தில், விஜய் மதுரை மாவட்டத்தில் உள்ள ஒரு தொகுதியில் போட்டியிடுவார் என தகவல்கள் தெரிவிக்கப்பட்டன. இருப்பினும், தற்போது கள்ளக்குறிச்சி மாவட்டத்தில் உள்ள ஒரு சட்டமன்றத் தொகுதியில் அவர் போட்டியிட இருப்பதாக புதிய தகவல்கள் வெளியாகியுள்ளன.
கள்ளக்குறிச்சி மாவட்டத்தை விஜய் தேர்ந்தெடுத்ததற்கு முக்கிய காரணமாக, தேசிய முற்போக்கு திராவிட கழகத்தின் (தேமுதிக) நிறுவனர் விஜயகாந்த் தான் என கூறப்படுகிறது. ஏனென்றால், விஜயகாந்த் இந்தப் பகுதியில் தனது ஆரம்பகால அரசியல் வெற்றியைப் பெற்றிருந்தது குறிப்பிடப்படுகிறது. மேலும், இந்த மாவட்டத்தில் இளைஞர்களின் ஆதரவு பெருமளவில் இருப்பதால், விஜய் இந்தத் தொகுதியை குறிவைத்து, தனது அரசியல் பயணத்தை வலுப்படுத்த திட்டமிட்டிருப்பதாக கூறப்படுகிறது.
விஜயகாந்த் 2005-ல் தேமுதிக கட்சியை தொடங்கி, கள்ளக்குறிச்சி மாவட்டத்தின் விருதாச்சலம் தொகுதியில் 2006 தேர்தலில் போட்டியிட்டு வெற்றி பெற்றவர். இந்தப் பின்னணியில், விஜய் இந்தப் பகுதியை தேர்ந்தெடுத்திருப்பது, தேமுதிகவின் பாரம்பரிய ஆதரவு தளத்தைப் பயன்படுத்தி, இளைஞர்களின் ஆதரவை மேலும் திரட்டுவதற்கு உத்தியாக பார்க்கப்படுகிறது.
இந்தத் தகவல், 2006 சட்டமன்றத் தேர்தலை முன்னிட்டு தேமுதிகவின் அரசியல் உத்திகள் மற்றும் விஜயின் அரசியல் நுழைவு குறித்து தீவிர விவாதங்களை ஏற்படுத்தியுள்ளது. இருப்பினும், இந்தச் செய்தி வதந்தியாக பரவும் தகவலாகவும் இருக்கலாம் என கூறப்படுகிறது. இது உண்மை தகவல் என்றால் விஜய் எந்த தொகுதியில் போட்டியிடுவார் என்பதை அறிவித்த பிறகு தான் தெரிய வரும். மேலும், வரும் ஆகஸ்ட் 21 -ஆம் தேதி விஜய் தனது கட்சியின் இரண்டாவது மாநாட்டை பிரமாண்டமாக மதுரை மாவட்டத்தில் நடத்தவிருக்கிறார் என்பதும் குறிப்பிடத்தக்கது.