சென்னை : தமிழக வெற்றி கழகம் (தவெக) தலைவர் விஜய் உள்ளிட்ட முக்கிய நிர்வாகிகள் மீது சென்னையில் இரண்டு பிரிவுகளில் வழக்கு பதிவு செய்யப்பட்டுள்ளது.தியாகராய நகர், எழும்பூர் மற்றும் ஆயிரம் விளக்கு தொகுதிகளில் நடைபெற்ற ரோடு ஷோவின்போது பொதுமக்களுக்கு தொல்லை ஏற்படுத்தியதாகவும், தேர்தல் நடத்தை விதிமுறைகளை மீறியதாகவும் கூறி மாம்பலம், நுங்கம்பாக்கம் மற்றும் வேப்பேரி காவல் நிலையங்களில் தனித்தனியாக வழக்குகள் பதிவு செய்யப்பட்டுள்ளன.
வழக்கு பதிவு செய்யப்பட்டவர்களில் தவெக தலைவர் விஜய், தி.நகர் தொகுதி வேட்பாளரும் கட்சியின் பொதுச்செயலாளருமான புஸ்ஸி ஆனந்த், எழும்பூர் தொகுதி வேட்பாளர் ராஜ்மோகன், ஆயிரம் விளக்கு தொகுதி வேட்பாளர் ஜே.சி.டி. பிரபாகர் மற்றும் தவெக தென்சென்னை வடக்கு மாவட்ட செயலாளர் அப்புனு ஆகியோர் அடங்குவர்.இந்த வழக்குகள் பொதுமக்களுக்கு தொல்லை ஏற்படுத்துதல் மற்றும் தேர்தல் நடத்தை விதிமுறைகளை மீறுதல் ஆகிய பிரிவுகளின் கீழ் பதிவு செய்யப்பட்டுள்ளன.
ரோடு ஷோவின்போது பெரும் எண்ணிக்கையிலான தொண்டர்கள் திரண்டதால் சாலைப் போக்குவரத்து சிறிது நேரம் பாதிக்கப்பட்டதாக புகார் அளிக்கப்பட்டது. இதனைத் தொடர்ந்து மூன்று காவல் நிலையங்களிலும் தனித்தனியாக வழக்குகள் பதிவு செய்யப்பட்டுள்ளன.
தேர்தல் ஆணையத்தின் விதிமுறைகளின்படி, பிரச்சாரத்தின்போது பொதுமக்களுக்கு இடையூறு ஏற்படுத்தாமல், அனுமதிக்கப்பட்ட நேர அட்டவணைக்கு உட்பட்டு செயல்பட வேண்டும் என்று தேர்தல் அதிகாரிகள் ஏற்கனவே எச்சரித்திருந்த நிலையில், இந்த வழக்கு பதிவு மேலும் பரபரப்பை ஏற்படுத்தியுள்ளது.
தவெக தரப்பில் இதுகுறித்து இன்னும் எந்த அதிகாரப்பூர்வ விளக்கமும் வெளியிடப்படவில்லை. இருப்பினும், கட்சி நிர்வாகிகள் இந்த வழக்குகள் அரசியல் உள்நோக்கம் கொண்டவை என்று கூறி வருகின்றனர்.தேர்தல் நெருங்கும் நிலையில், விஜய் உள்ளிட்ட தவெக தலைவர்கள் மீது பதிவு செய்யப்பட்டுள்ள இந்த வழக்குகள் தமிழக அரசியல் களத்தில் புதிய விவாதங்களை ஏற்படுத்தியுள்ளன.