கூட்டணியில் திருப்பம்? காங்கிரஸ்–த.வெ.க பேச்சுவார்த்தை தீவிரம்!

சென்னை : 2026 சட்டமன்றத் தேர்தல் நெருங்கி வரும் நிலையில், தமிழக அரசியல் கட்சிகளிடையே கூட்டணி பேச்சுவார்த்தைகள் மிகுந்த தீவிரத்துடன் நடைபெற்று வருகின்றன. திமுக தனது மதச்சார்பற்ற முற்போக்குக் கூட்டணியை வலுப்படுத்தும் முயற்சியில் தீவிரமாக ஈடுபட்டுள்ளது. காங்கிரஸ், விசிக், மமக, இந்திய கம்யூனிஸ்ட் கட்சி உள்ளிட்ட கட்சிகளுடன் தொகுதி பங்கீடு, தேர்தல் உத்தி குறித்து விரிவான ஆலோசனைகள் நடைபெற்று வருகின்றன.

இந்த சூழலில் காங்கிரஸ் – திமுக இடையேயான பேச்சுவார்த்தைகள் எதிர்பார்த்த அளவுக்கு முன்னேற்றம் காணவில்லை என்ற தகவல்கள் கட்சி வட்டாரங்களில் பரவி வருகின்றன.திமுகவுடன் தொகுதி பங்கீடு பேச்சுவார்த்தையில் தொய்வு ஏற்பட்டுள்ள நிலையில், காங்கிரஸ் கட்சி தவெக (தமிழக வெற்றிக் கழகம்) உடன் திரைமறைவு பேச்சுவார்த்தை நடத்தி வருவதாக தகவல்கள் வெளியாகியுள்ளன. இந்த பேச்சுவார்த்தைகள் இதுவரை அதிகாரப்பூர்வமாக அறிவிக்கப்படவில்லை என்றாலும், கட்சி வட்டாரங்களில் இது குறித்து பரவலாக விவாதிக்கப்பட்டு வருகிறது.

காங்கிரஸ் மேலிட பொறுப்பாளர்கள் மற்றும் தவெக தரப்பு இடையே தொடர்பு ஏற்பட்டுள்ளதாகவும், இரு தரப்பும் ஒருவருக்கொருவர் எதிர்பார்ப்புகளை பகிர்ந்து கொண்டதாகவும் தகவல்கள் கூறுகின்றன.தவெக தலைவர் நடிகர் விஜய் ஏற்கனவே தனித்துப் போட்டியிடுவதாக அறிவித்திருந்தாலும், காங்கிரஸ் கட்சியுடன் தொடர்பு ஏற்படுத்துவது குறித்து பல்வேறு ஊகங்கள் எழுந்துள்ளன.

இளைஞர்கள் மத்தியில் தவெகவுக்கு அதிகரித்து வரும் செல்வாக்கு, காங்கிரஸ் கட்சிக்கு கூட்டணி வாய்ப்பாக பார்க்கப்படுகிறது என்று அரசியல் வட்டாரங்கள் கருதுகின்றன. ஏற்கனவே ஜனநாயகன் படம் ரிலீஸ் பிரச்சினைக்கு காங்கிரஸ் தொடர்ச்சியாக விஜய்க்கு ஆதரவு கொடுத்தது குறிப்பிடத்தக்கது. இந்த நட்புறவு தற்போது கூட்டணி வாய்ப்பாக மாறியுள்ளதாக தகவல்கள் தெரிவிக்கின்றன.இருப்பினும், இந்த தகவல்கள் அதிகாரப்பூர்வமாக உறுதிப்படுத்தப்படவில்லை. காங்கிரஸ் மேலிட பொறுப்பாளர்கள் இதுவரை எந்த உறுதியான அறிவிப்பும் வெளியிடவில்லை.

திமுகவுடனான பேச்சுவார்த்தை தொடர்ந்து நடைபெற்று வருவதாகவும், தவெக உடனான தொடர்பு இன்னும் ஆரம்ப நிலையிலேயே உள்ளதாகவும் கட்சி வட்டாரங்கள் தெரிவிக்கின்றன. தவெக தரப்பிலிருந்தும் இதுவரை எந்த அதிகாரப்பூர்வ அறிவிப்பும் வெளியாகவில்லை.ஒட்டுமொத்தமாக, திமுக – காங்கிரஸ் கூட்டணி பேச்சுவார்த்தையில் ஏற்பட்டுள்ள தொய்வு, காங்கிரஸை தவெக உடன் நெருங்கச் செய்துள்ளதாகத் தெரிகிறது.