விவசாயிகள் போராட்டம்! ஹரியானாவின் 7 மாவட்டங்களில் மீண்டும் இணைய சேவை தொடக்கம்

விவசாயிகள் போராட்டம் காரணமாக ஹரியானாவின் 7 மாவட்டங்களில் இணைய சேவையை அரசு முடக்கியிருந்த நிலையில் தற்போது அந்த 7 மாவட்டங்களில் இணைய சேவை மீண்டும் வழங்கப்பட்டுள்ளது. வேளாண் பொருட்களுக்கான குறைந்தபட்ச ஆதரவு விலை, விவசாய கடன் தள்ளுபடி, விவசாயிகளுக்கு ஓய்வூதியம் உள்ளிட்ட பல்வேறு கோரிக்கைகளை வலியுறுத்தி பஞ்சாப், ஹரியானா மாநில விவசாயிகள் கடந்த 13-ம் தேதி டெல்லி நோக்கி பேரணி மேற்கொள்ள திட்டமிட்டிருந்தனர்.

இதையடுத்து, பேரணிக்கு இரண்டு தினங்கள் முன்பாகவே, அதாவது பிப்ரவரி 11ஆம் தேதி அம்பாலா, குருக்ஷேத்ரா, கைதல், ஜிந்த், ஹிசார், ஃபதேஹாபாத் மற்றும் சிர்சா ஆகிய 7 மாவட்டங்களில் இணைய சேவையை முடக்க மாநிலத்தின் முதல்வர் மனோகர் லால் கத்தார் அதிரடியாக உத்தரவு பிறப்பித்தார். பொது ஒழுங்கை பாதுகாக்கும் நோக்கில் இணைய சேவை முடக்கப்படுவதாக தெரிவிக்கப்பட்டிருந்தது.

Read More – 554 ரயில் நிலையங்கள்… 1,500 ரயில்வே மேம்பாலங்கள் திட்டப்பணிகள்.! பிரதமர் மோடி துவக்கம்.!

விவசாய போராட்டத்தில் உயிரிழப்பு ஏற்பட்ட நிலையில், விவசாயிகள் தங்கள் போராட்டத்தை பிப்ரவரி 29-ம் தேதி வரையில் தற்காலிகமாக நிறுத்துவதாக அறிவித்தனர். இந்த நிலையில், அந்த 7 மாவட்டங்களில் இணைய சேவை மீண்டும் வழங்கப்பட்டுள்ளதாக அரசு சார்பில் அறிவிப்பு வெளியாகியுள்ளது. அம்பாலாவில் வசிக்கும் மக்கள் அரசின் இந்த முடிவை வரவேற்றுள்ளனர். பல நாட்கள் இடைவெளிக்குப் பிறகு இணைய சேவை மீண்டும் வழங்கப்பட்டுள்ளது ஆறுதலாக உள்ளதாக தெரிவித்துள்ளனர்.