கேரளாவில் மும்முனை போட்டி… களத்தில் 194 வேட்பாளர்கள்.. வாக்குபதிவின் தற்போதைய நிலவரம்!

Kerala Election: கேரளாவில் மக்களவை தேர்தலின் வாக்குப்பதிவு இன்று நடைபெற்று வரும் நிலையில், 9 மணி நிலவரப்படி 11.98% வாக்கு பதிவானதாக தகவல்.

இன்று நாடு முழுவதும் 13 மாநிலங்களில் மக்களவை தேர்தலின் இரண்டாம் கட்ட வாக்குப்பதிவு இன்று காலை 7 மணி முதல் விறுவிறுப்பாக நடைபெற்று வருகிறது. இதில் குறிப்பாக கேரளாவில் உள்ள 20 மக்களவை தொகுதிகளுக்கான வாக்குப்பதிவு இன்று ஒரே கட்டமாக நடைபெறுகிறது.

கேரளாவில் ஆளும் இடதுசாரிகள் கூட்டணி, காங்கிரஸ் கூட்டணி மற்றும் பாஜக கூட்டணி என மும்முனை போட்டி நிலவி வரும் நிலையில், 194 வேட்பாளர்கள் களத்தில் உள்ளனர். எனவே மக்களவை தேர்தலின் வாக்குப்பதிவுக்கான அணைத்து ஏற்பாடுகளும் தேர்தல் ஆணையம் செய்துள்ளது.

பதற்றமான மற்றும் அச்சுறுத்தல் இருக்கும் வாக்குச்சாவடிகள் தீவிர கண்காணிப்பில் இருந்து வருகிறது. இந்த சூழலில் இன்று காலை முதல் கேரளாவில் வாக்குப்பதிவு நடைபெற்று வரும் நிலையில், அரசியல் தலைவர்கள், பிரபலங்கள் மற்றும் பொதுமக்கள் என அனைவரும் தங்களது ஜனநாயக கடமையை ஆற்றி வருகின்றனர்.

இந்த நிலையில், கேரளாவில் காலை 9 மணி நிலவரப்படி 11.98% வாக்குங்கள் பதிவாகி உள்ளதாக தகவல் வெளியாகியுள்ளது. இதில் அதிகபட்சமாக அட்டிங்கள் 9.52%, கோட்டயம் 9.37%, ஆழப்புலா 9.02%, மாவேலிக்கராவில் 8.88% வாக்குகள் பதிவாகியுள்ளதாக கூறப்படுகிறது.

இதுபோன்று மற்ற மாநிலங்களில் காலை 9 மணி நிலவரப்படி, அசாம் 9.71%, பீகார் 9.84%, சத்தீஸ்கர் 15.42%, ஜம்மு காஷ்மீர் 10.39%, கர்நாடகா 9.21%, மத்திய பிரதேசம் 13.82%, மகாராஷ்டிரா 7.45%, மணிப்பூர் 15.49%, ராஜஸ்தான் 11.77%, திரிபுரா 16.65%, உத்தர பிரதேசம் 11.67%, மேற்கு வங்கம் 15.68% வாக்குகள் பதிவாகியுள்ளது.