மேற்கு வங்க முதல்வராக பதவியேற்றார் பாஜகவின் சுவேந்து அதிகாரி!

மேற்கு வங்கம் : சட்டமன்றத் தேர்தல் 2026-ல் பாரதிய ஜனதா கட்சி (பாஜக) அமோக வெற்றி பெற்றுள்ளது. மொத்தம் 294 தொகுதிகளில் 207 இடங்களை கைப்பற்றிய பாஜக, தனிப்பெரும் பெரும்பான்மையுடன் ஆட்சியமைக்கும் நிலையை எட்டியுள்ளது. இதன் மூலம், முதலமைச்சர் மம்தா பானர்ஜியின் திரிணாமுல் காங்கிரஸ் (டிஎம்சி) கட்சியின் 15 ஆண்டுகால ஆட்சிக்கு முடிவு கட்டப்பட்டுள்ளது.

தேர்தல் முடிவுகளின்படி, மம்தா பானர்ஜியின் டிஎம்சி 80 தொகுதிகளில் மட்டுமே வெற்றி பெற்றது. காங்கிரஸ் 2 தொகுதிகளிலும், மார்க்சிஸ்ட் கம்யூனிஸ்ட் கட்சி 1 தொகுதியிலும், மற்ற கட்சிகள் 3 தொகுதிகளிலும் வெற்றி பெற்றன. மெஜாரிட்டிக்கு 147 தொகுதிகள் தேவைப்படும் நிலையில், பாஜக 207 இடங்களை கைப்பற்றி மிகப்பெரிய வெற்றியைப் பதிவு செய்துள்ளது.

குறிப்பிடத்தக்க வகையில், மம்தா பானர்ஜி தானே போட்டியிட்ட பாபனிபூர் தொகுதியில் தோல்வியடைந்தார். அவர் 58,812 வாக்குகள் பெற்ற நிலையில், பாஜகவின் சுவேந்து அதிகாரி 73,917 வாக்குகள் பெற்று 15,105 வாக்குகள் வித்தியாசத்தில் அவரை வீழ்த்தினார். இதன் மூலம், 2011, 2016, 2021 ஆகிய மூன்று தேர்தல்களிலும் தொடர்ந்து வெற்றி பெற்று முதலமைச்சராக இருந்த மம்தா பானர்ஜியின் ஆட்சிக்கு முடிவு ஏற்பட்டது.

மேற்கு வங்க வரலாற்றில் முதல் முறையாக பாஜக ஆட்சியை கைப்பற்றியுள்ளது. புதிய முதலமைச்சராக சுவேந்து அதிகாரி பொறுப்பேற்றார். ஆளுநர் ஆர்.என். ரவி அவருக்கு பதவிப் பிரமாணம் செய்து வைத்தார். பதவியேற்பு விழாவில் பிரதமர் நரேந்திர மோடி, உள்துறை அமைச்சர் அமித் ஷா உள்ளிட்ட முக்கிய பாஜக தலைவர்கள் பங்கேற்றனர்.

இந்த வெற்றி மேற்கு வங்க அரசியலில் பெரும் மாற்றத்தை ஏற்படுத்தியுள்ளது. பாஜக தரப்பில் இருந்து “மக்கள் மாற்றத்தை விரும்பினர்” என்று கூறப்பட்டு வரும் நிலையில், மம்தா பானர்ஜி தரப்பில் இருந்து தேர்தல் முறைகேடுகள் குறித்து குற்றச்சாட்டுகள் எழுந்துள்ளன. இந்த முடிவுகள் மேற்கு வங்க அரசியலின் புதிய அத்தியாயத்தைத் தொடங்கியுள்ளன.