பிகார் : மாநிலத்தின் வைஷாலி மாவட்டத்தில் 1992-ஆம் ஆண்டு நடைபெற்ற கொலை முயற்சி வழக்கில், 34 ஆண்டுகளுக்குப் பிறகு நீதிமன்றம் முக்கிய தீர்ப்பை வழங்கியுள்ளது. இந்த வழக்கில் குற்றவாளி என அறிவிக்கப்பட்ட 85 வயதான தீப் ராய்க்கு 3 ஆண்டுகள் சிறைத் தண்டனை விதிக்கப்பட்டுள்ளது.
கூடுதல் மாவட்ட மற்றும் அமர்வு நீதிபதி மனோஜ் குமார் திவாரி வழங்கிய தீர்ப்பில், கலவரத்தில் ஈடுபட்டது, ஆபத்தான ஆயுதங்களுடன் தாக்குதல் நடத்தியது, கொலை முயற்சியில் ஈடுபட்டது மற்றும் ஆயுதச் சட்டத்தை மீறியது உள்ளிட்ட குற்றச்சாட்டுகள் நிரூபிக்கப்பட்டதாக கூறப்பட்டுள்ளது.
இதே வழக்கில் தொடர்புடைய நகேஷ்வர் ராய் (59), ஜெகதீஷ் ராய் (50), நரேஷ் ராய் (60), நாக்தேவ் ராய் (62) ஆகிய மேலும் 4 பேருக்கும் தலா 10 ஆண்டுகள் கடுங்காவல் சிறைத் தண்டனையும், தலா ரூ.25,000 அபராதமும் விதிக்கப்பட்டுள்ளது.
இந்த வழக்கு 1992-ஆம் ஆண்டு நடந்த சம்பவத்தைச் சார்ந்தது. அப்போது கிராமத்தில் உள்ள பொதுப் பாதையில் உடைந்த கண்ணாடி துண்டுகளை அகற்றுவது தொடர்பாக இரண்டு தரப்பினருக்கும் தகராறு ஏற்பட்டதாக கூறப்படுகிறது. இந்த வாக்குவாதம் பின்னர் மோதலாக மாறிய நிலையில், ஆயுதங்களுடன் வந்த குற்றவாளிகள் துப்பாக்கிச் சூடு நடத்தியதாக விசாரணையில் தெரியவந்தது.
இந்த தாக்குதலில் புகார்தாரர், அவரது அத்தை மற்றும் மேலும் இரு கிராம மக்கள் படுகாயமடைந்தனர். அப்போது 51 வயதாக இருந்த தீப் ராய், தாக்குதலைத் தூண்டியதாகவும், காயமடைந்த பெண்ணை நோக்கி துப்பாக்கிச் சூடு நடத்த உத்தரவிட்டதாகவும் குற்றம்சாட்டப்பட்டது.
வழக்கை விசாரித்த நீதிமன்றம், பாதிக்கப்பட்டவர்களின் சாட்சியங்களையும், விசாரணை ஆவணங்களையும் அடிப்படையாகக் கொண்டு குற்றச்சாட்டுகள் நிரூபிக்கப்பட்டதாக தெரிவித்தது. மேலும், "பயன்படுத்தப்பட்ட ஆயுதங்கள் உயிருக்கு ஆபத்தான துப்பாக்கிகள் என்பதால், கொலை செய்யும் நோக்கம் இருந்தது என்பது தெளிவாகிறது" என்று நீதிமன்றம் தனது தீர்ப்பில் குறிப்பிட்டுள்ளது.
85 வயதை கடந்துள்ள தீப் ராய், விசாரணை முழுவதும் ஜாமீனில் இருந்ததால், மேல்முறையீடு செய்யும் வாய்ப்பை வழங்கும் வகையில் தற்காலிக ஜாமீன் வழங்கப்பட்டுள்ளது. உயர்நீதிமன்றத்தில் மேல்முறையீடு செய்ய அவர் அவகாசம் பெறுவார் என்று நீதிமன்றம் தெரிவித்துள்ளது. மூன்று தசாப்தங்களுக்கும் மேலாக நீடித்த இந்த வழக்கில் தற்போது தீர்ப்பு வழங்கப்பட்டிருப்பது பிகார் மாநிலம் முழுவதும் பெரும் விவாதத்தைக் கிளப்பியுள்ளது.