நியூ டில்லி:பாரத் சஞ்சார் நிகாம் லிமிடெட் ( BSNL) நிறுவனத்தின் 25ஆம் ஆண்டு வெள்ளி விழாவையொட்டி, இந்தியா முழுவதும் ‘ஸ்வதேசி’ 4G சேவையை இன்று (செப்டம்பர் 27) பிரதமர் நரேந்திர மோடி தொடங்கி வைக்கிறார். ரூ.37,000 கோடி மதிப்புள்ள இந்த திட்டம், ஏறக்குறைய 98,000 இடங்களில் 4G டவர்களை அறிமுகப்படுத்தி, 29,000-30,000 கிராமங்களை டிஜிட்டல் இணைப்புடன் இணைக்கும்.
ஓடிஷாவின் ஜார்சூகுடாவில் நடைபெறும் இந்த நிகழ்ச்சி, இந்தியாவை டென்மார்க், சுவீடன், தென் கொரியா, சீனாவைத் தொடர்ந்து 5ஆவது நாடாக உள்ளூர் தொலைதொடர்பு தொழில்நுட்பத்தை உருவாக்கியுள்ளதாக அறிவிக்கிறது.இந்த 4G ஸ்டேக், டெஜஸ் நெட்வொர்க்ஸ், சி-டாட் மற்றும் டிசிஎஸ் போன்ற இந்திய நிறுவனங்களால் உருவாக்கப்பட்டு, கிளவுட் அடிப்படையிலானது மற்றும் 5G-க்கு எளிதாக அப்கிரேட் செய்யக்கூடியது.
இது குறித்து தொலைதொடர்பு அமைச்சர் ஜ்யோதிராதித்ய சிந்தியா கூறுகையில், “இது இந்தியாவின் டெலிகாம் துறையில் புதிய யுகத்தைத் தொடங்குகிறது. இந்தியா இப்போது உலகின் முதல் 5 நாடுகளில் இடம்பிடுத்துள்ளது,” என்றார். இந்த திட்டம், டிஜிட்டல் பாரத் நிதி (DBN) திட்டத்தின் கீழ் 100% 4G சேவை உறுதிப்படுத்தும். தமிழ்நாட்டில், யூனிவர்சல் சர்வீஸ் ஆப்லிகேஷன் ஃபண்ட் (USOF) உதவியுடன் BSNL, 620 தொலைதூர கிராமங்களில் 4G சேவையை விரிவுபடுத்துகிறது.
இதில் 222 கிராமங்களில் புதிய டவர்கள் அமைக்கப்பட்டுள்ளன, 35 கிராமங்களில் உள்ளடக்கிய 4G டவர்கள் மேம்படுத்தப்பட்டுள்ளன. இந்த சேவை, தமிழ்நாட்டின் கிராமப்புறங்களில் இணைய அணுகலை மேம்படுத்தி, கல்வி, சுகாதாரம் மற்றும் விவசாயத்தில் டிஜிட்டல் மாற்றத்தை ஏற்படுத்தும். இந்த தொடக்கம், இந்தியாவின் டிஜிட்டல் இந்தியா திட்டத்தின் முக்கிய அங்கமாக அமைந்துள்ளது. BSNL-ன் இந்த ‘ஸ்வதேசி’ தொழில்நுட்பம், வெளிநாட்டு சார்ந்திருப்பை குறைத்து, உள்ளூர் உற்பத்தியை ஊக்குவிக்கும். இன்றைய நிகழ்ச்சியில் பல மாநிலங்களில் ஒரே நேரத்தில் லாஞ்ச் நடைபெறும், இதன் மூலம் 22 மில்லியன் BSNL வாடிக்கையாளர்கள் 4G-ன் பயன்பெறுவார்கள்.