டெல்லி : கூகுள் போட்டோஸ் (Google Photos) செயலியில் வீடியோ எடிட்டிங் அனுபவத்தை முற்றிலும் மாற்றும் வகையில் 'வீடியோ ரீமிக்ஸ்' (Video Remix) என்ற அதிநவீன செயற்கை நுண்ணறிவு (AI) வசதியை கூகுள் நிறுவனம் அதிகாரப்பூர்வமாக அறிமுகப்படுத்தியுள்ளது. கூகுளின் மிகச்சிறந்த 'ஜெமினி ஆம்னி' (Gemini Omni) தொழில்நுட்பத்தில் இயங்கும் இந்த வசதியானது, பயனர்கள் எந்தவிதமான சிக்கலான எடிட்டிங் மென்பொருட்களும் இன்றி, மிக எளிமையாகத் தங்களது வீடியோக்களைத் தொழில்முறைத் தரத்திற்கு மாற்ற உதவுகிறது.
பயனர்கள் தங்களது செயலியில் உள்ள 'Create' டேபிற்குச் சென்று, தங்களுக்குத் தேவையான டெம்ப்ளேட்களைத் தேர்ந்தெடுப்பதன் மூலம், வீடியோவில் உள்ள இருண்ட பகுதிகளைச் சரிசெய்யும் 'சினிமேட்டிக் ரிலைய்டிங்' (Cinematic Relighting), வீடியோவின் பின்னணியை மாற்றும் வசதி மற்றும் வீடியோக்களை நீர்வண்ண ஓவியம் அல்லது ஸ்கெட்ச் போன்ற கலைநயமிக்க வடிவங்களுக்கு மாற்றும் வசதிகளைப் பெற முடியும்.
தற்போது இந்தச் சிறப்பம்சமானது 10 வினாடிகள் வரையிலான வீடியோக்களுக்கு மட்டுமே ஆதரவு அளிக்கிறது, எனவே பயனர்கள் நீண்ட வீடியோக்களிலிருந்து தேவையான பகுதியைத் தேர்ந்தெடுத்து எடிட் செய்துகொள்ளலாம். இந்த முதற்கட்ட அறிமுகத்தில், கூகுளின் பிரத்யேக சந்தாதாரர்களான Google AI Plus, Google AI Pro மற்றும் Google AI Ultra பயனர்கள் மட்டுமே இந்த வசதியைப் பெற முடியும்.
அமெரிக்கா, ஜப்பான், பாகிஸ்தான், துருக்கி மற்றும் இந்தியா உள்ளிட்ட பல்வேறு முக்கிய நாடுகளில் இந்த வசதி தற்போது நடைமுறைக்கு வந்துள்ளது. தொழில்நுட்ப அறிவு இல்லாத சாதாரண பயனர்களும் தங்களது நினைவுகளை மிக அழகாகவும், சினிமா தரத்திலும் உருவாக்க உதவும் இந்த 'வீடியோ ரீமிக்ஸ்' வசதி, ஸ்மார்ட்போன் பயனர்கள் மத்தியில் பெரும் எதிர்பார்ப்பை ஏற்படுத்தியுள்ளது. கூகுளின் இந்த முயற்சி, எதிர்காலத்தில் வீடியோ எடிட்டிங் துறையில் ஒரு புதிய மைல்கல்லாக அமையும் என்பதில் மாற்றுக் கருத்தில்லை.