IND vs NZ ODI: இந்தியாவிற்கெதிராக டாம் லேதம் சதம்! நியூசிலாந்து அணி அபார வெற்றி.!

இந்தியா-நியூசிலாந்து முதல் ஒருநாள் போட்டியில் நியூசிலாந்து அணி 7 விக்கெட் வித்தியாசத்தில் வெற்றி.

நியூசிலாந்தில் சுற்றுப்பயணம் செய்து விளையாடிவரும் இந்திய அணி இன்று முதல் ஒருநாள் போட்டியில் ஆக்லாந்தில் விளையாடியது. டாஸ் வென்ற நியூசிலாந்து அணி முதலில் பந்துவீச்சை தேர்வு செய்தது.

இதன்படி முதலில் களமிறங்கிய இந்திய அணியில் தவான், சுப்மன் கில், ஷ்ரேயஸ் ஐயர் ஆகியோரின் அரைசதத்தால் இந்திய அணி 300 ரன்களைக்கடந்தது. நிர்ணயிக்கப்பட்ட 50 ஓவர்கள் முடிவில் இந்திய அணி 7 விக்கெட் இழப்புக்கு 306 ரன்கள் குவித்தது.

அதிகபட்சமாக இந்திய அணியில் ஷ்ரேயஸ் ஐயர் 80, தவான் 72, சுப்மன் கில் 50, சாம்சன் 36, வாஷிங்டன் சுந்தர் 37* ரன்கள் குவித்தனர். நியூசிலாந்து சார்பில் டிம் சவுதி மற்றும் பெர்குசன் தலா 3 விக்கெட்களும் வீழ்த்தினர்.

307 ரன்கள் வெற்றி இலக்குடன் களமிறங்கிய நியூசிலாந்து அணியில் டாம் லேதம் மற்றும் வில்லியம்சன் ஆகியோர் சிறப்பாக விளையாடி அணியை வெற்றி பெறச்செய்தனர். சிறப்பாக விளையாடி டாம் லேதம் தனது சதத்தை நிறைவு செய்தார்.

இதனால் 47.1 ஓவர்களிலேயே அந்த அணி 3 விக்கெட்களை மட்டும் இழந்து இலக்கை அடைந்தது. அதிகபட்சமாக டாம் லேதம் 145 ரன்களும், கேப்டன் வில்லியம்சன் 94 ரன்களும் குவித்தனர். இந்தியா தரப்பில் உம்ரன் மாலிக் 2 விக்கெட்களை வீழ்த்தினார். டாம் லேதம் ஆட்டநாயகனாக தேர்வு செய்யப்பட்டார்.