கொல்கத்தா :இந்தியா – தென்னாப்பிரிக்கா டெஸ்ட் தொடரின் முதல் போட்டி நவம்பர் 14-ஆம் தேதி கொல்கத்தா ஈடன் கார்டன்ஸ் மைதானத்தில் தொடங்க உள்ளது. இந்திய அணியின் முன்னாள் பயிற்சியாளர் அபிஷேக் நாயர், இந்திய வேகப்பந்து வீச்சாளர் ஜஸ்பிரீத் பும்ரா இந்தத் தொடரில் மிகப்பெரிய தாக்கத்தை ஏற்படுத்துவார் என்று கணித்துள்ளார். குறிப்பாக ஈடன் கார்டன்ஸின் கருப்பு மண் பிட்ச் (black soil pitch) பும்ராவுக்கு மிகவும் உகந்தது என்று அவர் தெரிவித்தார்.
ஈடன் கார்டன்ஸ் பிட்ச் பாரம்பரியமாக ஸ்பின்னர்களுக்கு உதவும் கருப்பு மண் கொண்டது. ஆனால் இம்முறை கௌதம் கம்பீர் மற்றும் அணி நிர்வாகம் சீமர்களுக்கு உதவும் வகையில் பிட்ச் தயாரிக்க உள்ளதாகத் தகவல்கள் வெளியாகியுள்ளன. பிற்பகுதியில் ஸ்பின்னர்கள் ஆதிக்கம் செலுத்தலாம் என்றும் கூறப்படுகிறது. இந்நிலையில் அபிஷேக் நாயர், எந்தப் பிட்ச்சிலும் பும்ரா ஆபத்தானவர் என்று புகழாரம் சூட்டினார்.
ஸ்டார் ஸ்போர்ட்ஸ் நிகழ்ச்சியில் பேசிய அபிஷேக் நாயர், “கருப்பு மண் பிட்ச்சில் பும்ரா மிகவும் ஆபத்தானவராக (lethal) இருப்பார். எதிரணி வீரர்கள் அவரைப் பற்றி எவ்வளவு விவாதித்தாலும், அவரை எதிர்கொள்ளும் போது வேறு மாதிரியான அனுபவமாக இருக்கும். பும்ரா அணியில் இருந்தால், எல்லா கவனமும் அவர்மீதே இருக்கும். அவர் விக்கெட்டுகளை வீழ்த்துவார்” என்று கூறினார். பும்ராவின் வொர்க்லோட் மேனேஜ்மென்ட் குறித்தும் நாயர் பேசினார்.
ஆஸ்திரேலியாவுக்கு எதிரான டி20 தொடரில் இரு போட்டிகள் மழையால் ரத்தானதால் பும்ரா ஓய்வு பெற்று புத்துணர்ச்சியுடன் இருப்பார் என்று தெரிவித்தார். “இந்த மைதானத்தில் அவருக்கு உகந்த கண்டிஷன்கள் கிடைக்கும். அவர் மிகவும் உற்சாகமாக இருப்பார்” என்று கூறினார். அபிஷேக் நாயரின் இந்தக் கருத்து ரசிகர்களிடையே பெரும் எதிர்பார்ப்பை ஏற்படுத்தியுள்ளது. பும்ரா தென்னாப்பிரிக்கா பேட்ஸ்மேன்களை வீழ்த்தி இந்தியாவுக்கு வெற்றி தேடித் தருவார் என்று ரசிகர்கள் நம்பிக்கை தெரிவித்துள்ளனர். 2026 உலகக் கோப்பைக்கு முன்னதாக இந்தத் தொடர் இந்தியாவுக்கு முக்கியமானது. பும்ராவின் பங்களிப்பு அணியின் வெற்றியைத் தீர்மானிக்கும் என்று கிரிக்கெட் வல்லுநர்கள் கருதுகின்றனர்.