பாபர் அசாம், ஷதாப் கான் அதிரடியால் பாகிஸ்தான் எளிதாக வெற்றி!!

நியூசிலாந்து அணிக்கு எதிரான டி-20 யில் பாகிஸ்தான் அணி 6 விக்கெட் வித்தியாசத்தில் வெற்றி பெற்றுள்ளது.

நியூசிலாந்தில் பயணம் செய்து வங்காளதேசம், பாகிஸ்தான் அணிகள் முத்தரப்பு டி-20 தொடரில் விளையாடி வருகிறது. வங்க தேசம் மற்றும் பாகிஸ்தான் அணிகளுக்கிடையே நடைபெற்ற முதல் போட்டியில், பாகிஸ்தான் 21 ரன்கள் வித்தியாசத்தில் வெற்றி பெற்றிருந்தது. இந்த நிலையில் இரண்டாவது போட்டி நியூசிலாந்து மற்றும் பாகிஸ்தான் அணிகளுக்கிடையே நடைபெற்றது. டாஸ் வென்ற நியூசிலாந்து அணி முதலில் பேட்டிங் தேர்வு செய்தது.

இதன்படி முதலில் களமிறங்கிய நியூசிலாந்து அணி 20 ஓவர்கள் முடிவில் 8 விக்கெட் இழப்புக்கு 147 ரன்கள் எடுத்தது. அதிகபட்சமாக கான்வே(36), வில்லியம்சன்(31) மற்றும் மார்க் சாப்மேன் 32 ரன்களும் (16பந்துகளில்) எடுத்தனர். பாகிஸ்தான் அணியில் ஹாரிஸ் ராஃப் சிறப்பாக பந்துவீசி 3 விக்கெட்களும், மொஹம்மது நவாஸ் மற்றும் மொஹம்மது வாசிம் தலா 2 விக்கெட்களும் எடுத்தனர்.

148 ரன்கள் வெற்றி இலக்குடன் களமிறங்கிய பாகிஸ்தான் அணி பாபர் அசாம் மற்றும் ஷதாப் கான் ஆகியோரின் அதிரடி ஆட்டத்தால் நிர்ணயிக்கப்பட்ட இலக்கை 10 பந்துகள் மீதமிருக்கும் நிலையில் 18.2 ஓவரில் வென்றுள்ளது. பாபர் அசாம் 62 ரன்களும், ஷதாப் கான் 34 ரன்களும் அடித்து வெற்றிக்கு உதவியாக இருந்தனர்.