ரஷ்யாவின் ஏஎன்-26 ரக ராணுவ போக்குவரத்து விமானம் ஒன்று கிரீமியா தீபகற்பத்தில் விபத்துக்குள்ளாகி, விமானத்தில் இருந்த 29 பேரும் உயிரிழந்துள்ளனர். மார்ச் 31 அன்று மாலை 6 மணியளவில் (மாஸ்கோ நேரப்படி) கிரீமியா தீபகற்பத்தின் மீது வழக்கமான பயணத்தில் இருந்த இந்த விமானத்துடன் கட்டுப்பாட்டு அறையின் தொடர்பு திடீரென துண்டிக்கப்பட்டது. பின்னர் தேடுதல் மற்றும் மீட்புக் குழுக்கள் விபத்து இடத்தைக் கண்டுபிடித்தபோது, விமானம் பாறை நிறைந்த மலைப்பகுதியில் மோதி நொறுங்கியிருந்தது.
விமானத்தில் 23 பயணிகள் மற்றும் 6 பணியாளர்கள் இருந்தனர். அனைவரும் சம்பவ இடத்திலேயே உயிரிழந்ததாக ரஷ்ய பாதுகாப்பு அமைச்சகம் உறுதிப்படுத்தியுள்ளது.ரஷ்ய பாதுகாப்பு அமைச்சகம் வெளியிட்ட அறிக்கையில், “விமானத்தில் வெளிப்புற தாக்குதல் அல்லது எந்தவிதமான வெடிகுண்டு தாக்குதலும் நடைபெறவில்லை. தொழில்நுட்பக் கோளாறு காரணமாகவே விபத்து ஏற்பட்டிருக்கலாம்” என்று தெரிவிக்கப்பட்டுள்ளது. விபத்துக்கான காரணத்தை விசாரிக்க ஒரு சிறப்புக் குழு அனுப்பப்பட்டுள்ளது.
கிரீமியா தீபகற்பம் 2014ஆம் ஆண்டு ரஷ்யா ஆக்கிரமித்த பகுதி. இப்போது ரஷ்யாவின் கட்டுப்பாட்டில் உள்ள இந்தப் பகுதியில் அடிக்கடி ராணுவ விமானங்கள் இயக்கப்படும் நிலையில், இந்த விபத்து பெரும் அதிர்ச்சியை ஏற்படுத்தியுள்ளது.இந்தச் சம்பவம் தொடர்பாக ரஷ்ய அதிகாரிகள் முழு விசாரணையைத் தொடங்கியுள்ளனர்.
தொழில்நுட்பக் கோளாறு உறுதிப்படுத்தப்பட்டால், ரஷ்ய ராணுவ விமானப் படையின் பராமரிப்பு மற்றும் பாதுகாப்பு அம்சங்கள் குறித்து கேள்விகள் எழுந்துள்ளன.இந்த விபத்தில் உயிரிழந்த 29 பேரின் குடும்பத்தினருக்கு ரஷ்ய அரசு இரங்கல் தெரிவித்துள்ளது. விபத்து குறித்த முழு விசாரணை அறிக்கை விரைவில் வெளியிடப்படும் என்று எதிர்பார்க்கப்படுகிறது.