அமெரிக்க அதிபர் டொனால்ட் ட்ரம்ப், ஈரான் மீதான தாக்குதல்கள் குறித்துப் பேசியபோது, “அடுத்தது கியூபாதான்” என்று சூசகமாகப் பேசியுள்ளார். இந்தப் பேச்சு சர்வதேச அரசியல் வட்டாரத்தில் பெரும் பரபரப்பை ஏற்படுத்தியுள்ளது.சனிக்கிழமை Future Investment Initiative என்ற முதலீட்டாளர்கள் மாநாட்டில் உரையாற்றிய ட்ரம்ப், ஈரான் குறித்துப் பேசிய பிறகு திடீரென “And Cuba’s next, by the way. But pretend I didn’t say that. Cuba’s next” என்று கூறினார்.
இந்தக் கருத்து அமெரிக்கா அடுத்தகட்டமாக கியூபாவை இலக்காகக் கொள்ளலாம் என்ற சந்தேகத்தை எழுப்பியுள்ளது.அமெரிக்க வெளியுறவுத் துறை செயலர் மார்கோ ரூபியோவும் கியூபா குறித்து கடுமையான விமர்சனம் செய்தார். “கியூபாவுக்கு எண்ணெய் அல்லது எரிபொருள் இல்லாததற்குக் காரணம், அவர்கள் எல்லாவற்றையும் இலவசமாக வேண்டும் என நினைப்பதுதான். அவர்களின் பொருளாதார அமைப்பு செயல்படவில்லை என்பதால் கியூபா ஒரு பேரழிவாக உள்ளது” என்று அவர் தெரிவித்தார்.
இதேவேளையில், உலக சுகாதார அமைப்பின் பொதுச் செயலாளர் டெட்ரோஸ் அதானோம் கெப்ரேயேசஸ், கியூபாவின் நிலைமை கவலைக்குரியது என்று கூறினார். “சுகாதாரம் எந்த விலை கொடுத்தும் பாதுகாக்கப்பட வேண்டும். அது ஒருபோதும் அரசியல், எரிசக்தி தடை அல்லது மின்வெட்டுக்கு இரையாகக் கூடாது. கியூபாவில் சுகாதார சேவைகளைத் தொடர்ந்து வழங்குவதில் பெரும் சிரமம் ஏற்பட்டுள்ளது” என்று அவர் தெரிவித்தார்.
கியூபா தற்போது கடும் பொருளாதார மற்றும் எரிசக்தி நெருக்கடியில் சிக்கியுள்ளது. அமெரிக்காவின் கடுமையான பொருளாதாரத் தடைகள் (embargo) காரணமாக நாட்டின் பொருளாதாரம் மோசமடைந்து வருகிறது. இந்த நிலையில், மெக்சிகோவில் இருந்து “Nuestra America” என்ற மனிதாபிமான உதவிக் கப்பல் கூட்டமைப்பு கியூபாவுக்கு உணவு, மருந்து, சூரிய ஒளி பேனல்கள் மற்றும் சைக்கிள்களுடன் சென்று சேர்ந்துள்ளது.
ட்ரம்ப் மற்றும் அவரது ஆதரவாளர்கள் கியூபாவில் ஆட்சி மாற்றம் (regime change) வேண்டும் என்று வெளிப்படையாகப் பேசி வருகின்றனர். “கியூபாவை நாம் எடுத்துக்கொள்ளலாம்” என்றும், அமெரிக்காவுக்கு ஏற்ற அரசை அங்கு அமைக்கலாம் என்றும் ட்ரம்ப் கூறியுள்ளார்.ஒட்டுமொத்தமாக, ஈரானுக்குப் பிறகு கியூபா அடுத்த இலக்காக இருக்கலாம் என்ற ட்ரம்ப்பின் பேச்சு, சர்வதேச அரசியலில் புதிய பதற்றத்தை ஏற்படுத்தியுள்ளது. கியூபாவின் தற்போதைய பொருளாதார நெருக்கடி மற்றும் அமெரிக்காவின் தொடர் அழுத்தங்கள் காரணமாக, அங்கு ஆட்சி மாற்றம் ஏற்படும் வாய்ப்பு குறித்த விவாதங்கள் தீவிரமடைந்துள்ளன.