சென்னை : காய்ச்சல் பாதிப்பு காரணமாக கோவை அவிநாசி சாலையில் உள்ள பிரபல தனியார் மருத்துவமனையில் அனுமதிக்கப்பட்டிருந்த வருவாய்த்துறை அமைச்சர் செங்கோட்டையன் தற்போது முழுமையாக குணமடைந்துள்ளதாக தகவல்கள் வெளியாகியுள்ளன. மருத்துவமனையில் முழு உடல் பரிசோதனை மேற்கொண்ட பிறகு அவர் வீடு திரும்பினார்.
மருத்துவமனையிலிருந்து வெளியே வந்த அமைச்சர் செங்கோட்டையன் செய்தியாளர்களை சந்தித்து பேசுகையில், “கடந்த எட்டு மாதங்களாக தொடர்ந்து கடுமையாக வேலை செய்ததால் வழக்கமான மருத்துவ பரிசோதனைக்காக மருத்துவமனையில் தங்கி இருந்தேன். ஆறு மாதத்திற்கு ஒருமுறை முழு உடல் பரிசோதனை செய்து கொள்வது என்னுடைய வழக்கம். ஆண்டுக்கு இரண்டு முறை ‘Master Checkup’ செய்து அனைத்து உடல் நிலைகளும் சரியாக இருக்கிறதா என்பதை பரிசோதித்து கொள்வேன்” என்று தெரிவித்தார்.
மேலும், “இந்த முறை எட்டு மாதங்கள் ஆகிவிட்டதால் அனைத்து பரிசோதனைகளும் மேற்கொள்ளப்பட்டது. தற்போது எல்லா பரிசோதனைகளும் நன்றாக உள்ளதாக மருத்துவமனை தெரிவித்துள்ளது. அதனால் விரைவில் சென்னை சென்று அரசு பணிகளை தொடர்ந்து கவனிக்க உள்ளேன்” என்றும் கூறினார். தொடர்ந்து பேசிய அவர், “எனக்கு பழக்கமான மருத்துவமனை இதுதான். உடல்நலக்குறைவு ஏற்பட்டாலும், ஓய்வு எடுக்க வேண்டியிருந்தாலும் நான் இங்கேதான் வருவேன். இது நீண்ட காலமாக பின்பற்றி வரும் நடைமுறை” என்று தெரிவித்தார்.
அரசு மருத்துவ செலவுகள் குறித்து கேள்வி எழுப்பப்பட்டபோது, “அரசு மருத்துவமனையில் இலவச சிகிச்சை பெறும் சலுகை எனக்கு இருந்தாலும், நான் தனியாக அரசு நிதியில் சிகிச்சை செலவு பெற வேண்டிய அவசியமில்லை. எனது உறவினர்களின் மருத்துவமனையில் இலவசமாக சிகிச்சை பெறுகிறேன்” என்று விளக்கம் அளித்தார். மேலும், “சென்னைக்கு வரும்போதும், போகும்போதும் இரவு நேரங்களில் இங்கே தங்குவது வழக்கம். இது தொடர்ந்து நடைபெற்று வரும் ஒன்று” என்றும் கூறினார்.
இதற்கிடையில், பெண்களுக்கான இலவச பேருந்து சேவை எப்போது தொடங்கப்படும் என்ற கேள்விக்கும் அமைச்சர் பதிலளித்தார். அதற்கு, “முந்தைய ஆட்சியில் கூட பல திட்டங்கள் படிப்படியாகத்தான் செயல்படுத்தப்பட்டன. அரசு நிதி நிலைக்கு ஏற்ப திட்டங்கள் அமல்படுத்தப்படும். பெண்களுக்கான இலவச பேருந்து சேவை குறித்து இறுதி முடிவு எடுப்பது முதலமைச்சரின் பொறுப்பு. அதற்கான பதிலை அவர்தான் கூற வேண்டும்” என்று தெரிவித்தார்.