சென்னை :தமிழ்நாட்டில் வரும் சட்டமன்றத் தேர்தல் வெளிப்படைத்தன்மை மிக்கதாகவும், நாட்டுக்கே முன்னுதாரணமாகவும் நடைபெறும் என்று இந்திய தலைமை தேர்தல் ஆணையர் ஞானேஷ் குமார் தெரிவித்துள்ளார். சென்னையில் செய்தியாளர்களிடம் பேசிய அவர், தேர்தல் திருவிழாவாக கொண்டாடப்படும் தமிழ்நாட்டின் ஜனநாயக பாரம்பரியத்தை பெருமிதத்துடன் எடுத்துரைத்தார்.
தமிழ்நாடு ஜனநாயகத்தை காப்பதில் எப்போதும் முன்னோடியாக உள்ளது என்று ஞானேஷ் குமார் குறிப்பிட்டார். 10ஆம் நூற்றாண்டிலேயே குடவோலை முறையில் தேர்தல் நடைமுறைகளை அறிமுகப்படுத்திய மாநிலம் தமிழ்நாடு என்றும், 72 நாடுகள் பங்கேற்ற சர்வதேச தேர்தல் கூட்டத்தில் தமிழ்நாட்டின் இந்த பாரம்பரியத்தை பெருமையுடன் பகிர்ந்ததாகவும் அவர் கூறினார்.
தேர்தல் அதிகாரிகள் எந்த அச்சமும் இன்றி சுதந்திரமாக செயல்படலாம் என்று ஆணையர் உறுதியளித்தார். சமூக வலைதளங்களில் பொய் செய்திகள், வதந்திகள் பரப்புபவர்களை கண்காணிப்போம் என்றும், அவை தேர்தல் நடைமுறையை பாதிக்காமல் தடுப்பதற்கு தேவையான நடவடிக்கைகள் எடுக்கப்படும் என்றும் தெரிவித்தார்.
வாக்குப்பதிவு இயந்திரங்களில் (EVM) வேட்பாளர்களின் வண்ணப் புகைப்படங்கள் இடம்பெறும் என்று ஞானேஷ் குமார் அறிவித்தார். தபால் வாக்குகள் இரு கட்டங்களாக எண்ணப்படும். மேலும், வாக்குப்பதிவு நிலவரம் ஒவ்வொரு 2 மணி நேரத்துக்கும் ஒருமுறை பதிவேற்றம் செய்யப்பட்டு பொதுமக்களுக்கு தெரியப்படுத்தப்படும் என்றும் அவர் விளக்கினார்.
தமிழ்நாட்டில் சட்டம் ஒழுங்கு சிறப்பாக உள்ளது என்று குறிப்பிட்ட ஆணையர், மாநிலம் முழுவதும் ஒரே கட்டமாக தேர்தல் நடத்துவது குறித்த முடிவை தேர்தல் ஆணையம் எடுக்கும் என்றார். ஒட்டுமொத்தமாக, இந்த தேர்தல் வெளிப்படைத்தன்மை, நம்பகத்தன்மை மற்றும் ஜனநாயக மதிப்புகளை முன்னிலைப்படுத்தும் வகையில் நடைபெறும் என்று அவர் நம்பிக்கை தெரிவித்தார்.