வாக்காளர் பட்டியலில் பேர் விடுபட்டவங்க விண்ணப்பிக்க ரெடியா? சென்னையில் சிறப்பு முகாம்!

சென்னை :தமிழ்நாட்டில் வாக்காளர் பட்டியலில் சிறப்பு தீவிர திருத்தப் பணிகள் (Special Intensive Revision – SIR) நவம்பர் 4, 2025 அன்று தொடங்கப்பட்டு, டிசம்பர் 14, 2025 அன்று நிறைவடைந்தன. இந்தப் பணிகள் தமிழ்நாடு உள்ளிட்ட 9 மாநிலங்கள் மற்றும் 3 யூனியன் பிரதேசங்களில் தேர்தல் ஆணையத்தின் உத்தரவின் பேரில் நடைபெற்றன. இதன் முக்கிய நோக்கம், வாக்காளர் பட்டியலை தூய்மையாக்குவது, இறந்த வாக்காளர்கள், குடிபெயர்ந்தவர்கள், முகவரியில் இல்லாதவர்கள், இரட்டைப் பதிவு செய்தவர்கள் போன்ற தவறான அல்லது தேவையற்ற பெயர்களை நீக்குவது ஆகும்.

இந்தத் திருத்தப் பணிகள் முடிந்ததைத் தொடர்ந்து, நேற்று (டிசம்பர் 19, 2025) மாவட்டங்கள் வாரியாக வரைவு வாக்காளர் பட்டியல் வெளியிடப்பட்டது. இதைத் தொடர்ந்து, தமிழ்நாடு தலைமைத் தேர்தல் அதிகாரி அர்ச்சனா பட்நாயக் செய்தியாளர்களைச் சந்தித்து விரிவான விவரங்களைத் தெரிவித்தார்.அவர் தெரிவித்த முக்கியத் தகவல்கள்: அக்டோபர் 27, 2025 வரை தமிழ்நாட்டில் மொத்த வாக்காளர்களின் எண்ணிக்கை 6 கோடி 41 லட்சம் 14,587 ஆக இருந்தது. SIR திருத்தப் பணிக்குப் பிறகு, நேற்று வெளியான வரைவு வாக்காளர் பட்டியலில் 5 கோடி 43 லட்சம் 76,755 வாக்காளர்கள் மட்டுமே இடம்பெற்றுள்ளனர். இதனால், மொத்தம் 97 லட்சம் 37 ஆயிரத்து 831 பெயர்கள் நீக்கப்பட்டுள்ளன.

நீக்கப்பட்ட பெயர்களின் பிரிவுகள்: இறந்த வாக்காளர்கள் 26 லட்சம் 94 ஆயிரத்து 672 பேர், குடிபெயர்ந்தவர்கள் அல்லது இடம்பெயர்ந்தவர்கள் 66 லட்சம் 44 ஆயிரத்து 881 பேர், இரட்டைப் பதிவு செய்தவர்கள் 3 லட்சம் 39 ஆயிரத்து 278 பேர்.வரைவு பட்டியலில் இடம்பெற்றுள்ள வாக்காளர்களின் வகைவாரியான விவரங்கள்: ஆண் வாக்காளர்கள் 2 கோடி 66 லட்சம் 63,233 பேர், பெண் வாக்காளர்கள் 2 கோடி 77 லட்சம் 6,332 பேர், மூன்றாம் பாலின வாக்காளர்கள் 7,191 பேர், மாற்றுத்திறனாளி வாக்காளர்கள் 4 லட்சம் 19 ஆயிரத்து 355 பேர்.

நேற்று வெளியான வரைவு பட்டியலில் பெயர் இடம்பெறாதவர்கள் அல்லது தவறுதலாக நீக்கப்பட்டவர்களுக்காக, சென்னை மாநகராட்சி சார்பில் சிறப்பு முகாம்கள் ஏற்பாடு செய்யப்பட்டுள்ளன. இன்று (டிசம்பர் 20) மற்றும் நாளை (டிசம்பர் 21) ஆகிய இரண்டு நாட்கள் சென்னை மாநகராட்சி எல்லைக்குட்பட்ட அனைத்து வாக்குச்சாவடிகளிலும் காலை 10 மணி முதல் மாலை 6 மணி வரை இந்த முகாம்கள் இயங்கும்.

எனவே, இதில் 18 வயது பூர்த்தியடைந்த புதிய வாக்காளர்களும், பெயர் சேர்க்க விரும்புவோரும் தகுந்த ஆவணங்களுடன் (ஆதார், பிறப்பு சான்றிதழ், பள்ளி சான்றிதழ் போன்றவை) நேரில் சென்று விண்ணப்பிக்கலாம்.மேலும், வரைவு பட்டியலில் ஆட்சேபனை தெரிவிக்க ஜனவரி 18, 2026 வரை கால அவகாசம் உள்ளது. இறுதி வாக்காளர் பட்டியல் 2026 பிப்ரவரி 14 அன்று வெளியிடப்படும் என்று தலைமைத் தேர்தல் அதிகாரி அர்ச்சனா பட்நாயக் தெரிவித்துள்ளார்.