டெல்லி :செப்டம்பர் 22, 2025 முதல் இந்தியாவில் புதிய ஜிஎஸ்டி மறுசீரமைப்பு அமலுக்கு வந்துள்ளது. இதற்கு முன் இருந்த 12% மற்றும் 28% வரி அடுக்குகள் நீக்கப்பட்டு, பெரும்பாலான பொருட்களுக்கு 5% மற்றும் 18% வரி மட்டுமே விதிக்கப்படுகிறது. இதனால், பால் பொருட்கள், சிற்றுண்டிகள், பழங்கள், மோட்டார் வாகனங்கள் போன்றவற்றின் விலைகள் கணிசமாகக் குறையும்.
56வது ஜிஎஸ்டி கவுன்சில் கூட்டத்தில் (செப்டம்பர் 3, 2025) எடுக்கப்பட்ட இந்த முடிவு, பொதுமக்களுக்கு செலவைக் குறைத்து, தொழில்களுக்கு வளர்ச்சி வாய்ப்பை ஏற்படுத்தும். ஆனால், சொகுசு கார்கள், புகையிலை பொருட்கள், கார்பனேற்றப்பட்ட பானங்கள் போன்றவற்றுக்கு 40% வரி விதிக்கப்படுவதால், அவற்றின் விலை உயரும்.
5% மற்றும் 0% வரி பொருட்கள்:
5% வரி பொருட்களில், வெண்ணெய், நெய், சீஸ், பனீர் போன்ற பால் பொருட்கள், பாதாம், முந்திரி, பிஸ்தா, அத்திப்பழம், பேரீச்சை, கொய்யா போன்ற பழங்கள் மற்றும் உலர் பழங்கள், நூடுல்ஸ், பாஸ்தா, நம்கீன், கார்ன் ஃப்ளேக்ஸ், ஐஸ்கிரீம், சாக்லேட், கேக்குகள், பிஸ்கட்கள், ஷாம்பு, பற்பசை, முடி எண்ணெய், சவரக் கிரீம், 20 லிட்டர் மினரல் வாட்டர், மருத்துவ ஆக்ஸிஜன், அறுவை சிகிச்சை கையுறைகள் ஆகியவை அடங்கும். இவை இப்போது மலிவாக கிடைக்கும்.
0% வரி (முற்றிலும் வரி இல்லை) பொருட்களில், ரொட்டி, பராத்தா, காக்ரா, UHT பால், உயிர்காக்கும் மருந்துகள் நோட்புக், பென்சில் ஷார்ப்னர், அழிப்பான், வரைபடப் புத்தகங்கள் ஆகியவை உள்ளன. இவை முற்றிலும் வரி இல்லாமல் விற்கப்படும்.
18% மற்றும் 40% வரி பொருட்கள்:
18% வரி பொருட்களில், சிமெண்ட், நிலக்கரி, ஏர் கண்டிஷனர், பாத்திரம் கழுவும் இயந்திரங்கள், ரூ.2,500-க்கு மேல் உள்ள ஆடைகள், ஆட்டோமொபைல் பாகங்கள், அச்சிடுதல் தாள் ஆகியவை அடங்கும். இவற்றின் விலை சற்று உயரலாம். 40% வரி பொருட்களில், பான் மசாலா, சிகரெட்டுகள், கார்பனேற்றப்பட்ட பானங்கள் (கோகோ கோலா, பெப்ஸி), 1200cc-க்கு மேல் உள்ள கார்கள், 350cc-க்கு மேல் உள்ள மோட்டார் சைக்கிள்கள், தனியார் விமானங்கள், படகுகள், ஆன்லைன் சூதாட்டம், குதிரைப் பந்தயம் ஆகியவை உள்ளன. இவை சொகுசு பொருட்களாகக் கருதப்பட்டு, விலை உயர்ந்தவையாக இருக்கும்.
வாகனங்கள் மற்றும் அமுல் பொருட்கள் விலை குறைப்பு:
TVS மோட்டார், பெட்ரோல், டீசல், எரிவாயு வாகனங்களின் விலையை 18% வரிக்கு மாற்றி, ரூ.5,000 முதல் 25,000 வரை குறைக்கிறது. இதில் அபாச்சி, ஜூபிடர், ரேடான், ரோனின், ஸ்கூட்டி உள்ளன. மஹிந்திரா & மஹிந்திரா: போலரோ/நியோ ரூ.1.27 லட்சம், எக்யூவி3எக்ஓ (பெட்ரோல்) ரூ.1.4 லட்சம், தார் 2WD (டீசல்) ரூ.1.35 லட்சம், ஸ்கார்பியோ கிளாசிக் ரூ.1.01 லட்சம் குறையும்.
டாடா மோட்டார்ஸ்: டியாகோ ரூ.75,000, டிகோர் ரூ.80,000, ஆல்ட்ராஸ் ரூ.1.10 லட்சம், பஞ்ச் SUV ரூ.85,000 குறையும். அதே சமயம், அமுல், 700-க்கும் மேற்பட்ட பொருட்களின் விலையைக் குறைத்துள்ளது: வெண்ணெய் 100g ரூ.58 (முன்பு ரூ.62), நெய் 1L ரூ.610 (முன்பு ரூ.650), சீஸ் 1kg ரூ.545 (முன்பு ரூ.575), பனீர் 200g ரூ.95 (முன்பு ரூ.99), ஐஸ்கிரீம் ரூ.9-550 (முன்பு ரூ.10-600). இந்த மாற்றங்கள், பொதுமக்களுக்கு பெரும் நிவாரணமாக இருக்கும்.
மேலும், இந்த புதிய ஜிஎஸ்டி நடைமுறை இன்று அமலுக்கு வந்துள்ள நிலையில், ஒட்டுமொத்தமாக 353 பொருட்களின் விலை குறைந்துள்ளது. ஜிஎஸ்டி வரி குறைப்பு பலன்கள் கிடைக்கவில்லையெனில் அது தொடர்பான, புகார்களை இலவச தொலைபேசி எண்ணிலும், NCH செயலி மற்றும் வலைதளத்திலும் பதிவு செய்யலாம் என மத்திய அரசு தெரிவித்துள்ளது. இதன்படி, ஜிஎஸ்டி குறித்த நுகர்வோர்களின் புகார்களை 1800-11-4000 என்ற எண்ணில் அளிக்கலாம் என்பதும் குறிப்பிடத்தக்கது.