கேரள : மாநிலம் கோட்டயம் அருகே உள்ள அதிரம்புழா பள்ளி சந்திப்புப் பகுதியில் நிகழ்ந்த ஒரு விசித்திரமான மற்றும் பரபரப்பான சம்பவம் சமூக வலைதளங்களில் பெரும் பேசுபொருளாகியுள்ளது.
இளைஞர் ஒருவர் தனது காரை நடுச்சாலையிலேயே திடீரென நிறுத்திவிட்டு அதன் உள்ளே தூங்கியதால் அப்பகுதியில் கடும் போக்குவரத்து நெரிசல் ஏற்பட்டது. நீண்ட தூரம் வாகனம் ஓட்டியதனால் ஏற்பட்ட அதீத சோர்வு காரணமாக அவர் காரை வழியிலேயே நிறுத்திவிட்டுத் தூங்கியதாக உள்ளூர் செய்தி ஊடகங்கள் தகவல் வெளியிட்டுள்ளன. இதனால் அந்த வழியாகச் சென்ற வாகன ஓட்டிகள் மற்றும் பொதுமக்கள் அனைவரும் கடுமையான அவதிக்கு உள்ளாகினர்.
சாலையின் நடுவே கார் நீண்ட நேரம் நின்றுகொண்டிருந்ததைக் கண்ட அப்பகுதி மக்கள் மற்றும் பயணிகள், உடனடியாக அருகில் சென்று காரில் உள்ளவரை எழுப்ப முயன்றனர். ஆனால், எவ்வளவு முயற்சி செய்தும் அந்த இளைஞரை எவராலும் எழுப்ப முடியவில்லை. காரின் உள்ளே அவர் ஆழ்ந்த உறக்கத்தில் இருந்ததால் பொதுமக்களின் முயற்சி தோல்வியில் முடிந்தது. இந்தச் சம்பவம் அப்பகுதியில் மேலும் பரபரப்பை ஏற்படுத்தியது.
நிலைமையை உணர்ந்த பொதுமக்கள் உடனடியாகக் காவல்துறையினருக்குத் தகவல் தெரிவித்தனர். சம்பவ இடத்திற்கு விரைந்து வந்த காவல்துறையினர் தீவிர விசாரணை மேற்கொண்டனர். அப்போது அந்த இளைஞர் மது அருந்தியிருந்தது விசாரணையில் தெரியவந்தது. இதனையடுத்து, காவல்துறையினர் அவர் மீது தகுந்த வழக்குப்பதிவு செய்து சட்டப்பூர்வ நடவடிக்கைகளை மேற்கொண்டுள்ளனர்.
இந்தச் சம்பவத்தின் போது எடுக்கப்பட்ட வீடியோ காட்சிகள் சமூக வலைதளங்களில் வைரலாகப் பரவி வருகின்றன. வீடியோவை பார்த்த பலரும் அவருக்கு நகைச்சுவையாக கருத்துக்களை கூறி வருகிறார்கள்.