கலக்கிட்டீங்க…”சிவகார்த்திகேயன் பெஸ்ட் அமரன் தான்”..புகழ்ந்து தள்ளிய ரஜினிகாந்த்!!

சென்னை : நடிகர் ரஜினிகாந்த் எப்போதுமே நல்ல திரைப்படங்கள் வெளியாகிறது என்றால் அதனைப் பார்த்துவிட்டுப் பாராட்டத் தவறியதே இல்லை. அப்படி தான் தற்போது, சிவகார்த்திகேயன் நடிப்பில் தீபாவளி விருந்தாக வெளியாகியுள்ள அமரன் படத்தையும் பார்த்துவிட்டு படத்தில் பணியாற்றியவர்களை தனித்தனியாகப் பாராட்டிப் பேசியுள்ளார். அவர் பாராட்டிப் பேசியதற்காக வீடியோவையும் சிவகார்த்திகேயன் தனது எக்ஸ் வலைத்தள பக்கத்தில் வெளியீட்டு நெகிழ்ச்சியுடன் நன்றியைத் தெரிவித்து இருக்கிறார் .

படத்தைப் பார்த்துவிட்டு தன்னுடைய அழுகையை அடக்கிக் கொள்ளமுடியாமல் எமோஷனலாக பேசிய ரஜினிகாந்த் முதலில் இப்படி ஒரு படத்தினை தயாரித்த கமல்ஹாசனுக்குப் பெரிய நன்றிகளையும் பாராட்டுகளையும் தெரிவித்தார். அதன்பிறகு “ஒருவரின் வாழ்க்கை வரலாற்றுப் படத்தினை இந்த அளவுக்கு அருமையாக எடுத்துக் கொடுக்க முடிமா? என எதிர்பார்த்ததை விட இயக்குநர் ராஜ்குமார் பெரியசாமி அருமையாகப் படத்தினை இயக்கி இருக்கிறார் அவருக்கு என்னுடைய வாழ்த்துக்கள்.மேஜர் முகுந்த் வரதராஜனின் வாழ்க்கையை அழகாகப் படத்தில் காண்பித்து இருக்கிறார்” எனத் தெரிவித்தார்.

பின், சாய்பல்லவி மற்றும் சிவகார்த்திகேயன் இருவருடைய நடிப்பு பற்றிப் பாராட்டிப் பேசினார். “படத்தில் சிவகார்த்திகேயன் நடிக்கவில்லை, படத்தில்  மேஜர் முகுந்த் வரதராஜனின் கதாபாத்திரத்தில் அவராகவே வாழ்ந்து இருக்கிறார். “என்ன ஒரு அருமையான நடிப்பு”…அவரை போலவே சாய் மிகவும் அழகாக நடித்து இருக்கிறார். சிவகார்த்திகேயன் சினிமா கேரியரில் சிறந்த படம் என்றால் அமரன் படம் தான் என நான் நிச்சயமாகச் சொல்வேன்” எனவும் கூறினார்.

அதனைத்தொடர்ந்து படம் பார்த்து மிகவும் தான் எமோஷனலாகிவிட்டதாகவும் அதற்கான காரணத்தைப் பற்றியும் ரஜினி பேசினார். இது குறித்து அவர் பேசியதாவது ” இந்த படத்தைப் பார்த்துவிட்டு முடித்த பின் என்னால் அழுகையை அடக்கிக் கொள்ளவே முடியவில்லை. ஏனென்றால், என்னுடைய அண்ணனும் ராணுவத்தில் தான் இருந்தார். அவருக்கு முதுகில் குண்டு பாய்ந்தது. படம் பார்த்தபோது ராணுவ வீரர்கள் எந்த அளவுக்கு கஷ்டப்படுகிறார்கள் என்பது தெரிந்தது.

கண்டிப்பாக மக்கள் அனைவரும் இந்த படத்தினை பார்க்கவேண்டும். திரையரங்குகளுக்குச் சென்று பாருங்கள் அந்த அளவுக்கு அருமையான படம்” எனவும் இதுவரை இல்லாத அளவுக்கு அமரன் படத்தினை ரஜினிகாந்த் பாராட்டி இருக்கிறார். சினிமாவில் ரஜினிதான் தனது குரு என சிவகார்த்திகேயன் பல மேடைகளில் பேசி இருக்கிறார்.

அப்படிப் பட்ட ஒருவரிடம் இருந்து பெரிய அளவில் பாராட்டுக்கள் கிடைத்தவுடன் சிவகார்த்திகேயன் மகிழ்ச்சியுடன் தனது எக்ஸ் வலைத்தள பக்கத்தில் “சூப்பர் ஸ்டாரின் பாராட்டுக்களால் நான் மிகவும் மகிழ்ச்சியடைகிறேன். அமரன் படத்தை அவர் பார்த்துவிட்டு படத்தின் ஒவ்வொரு நுணுக்கத்தையும் அவர் ரசித்தது எனக்கும், குழுவினருக்கும் மறக்க முடியாதது. உங்கள் நிலையான ஆதரவிற்கும் ஊக்கத்திற்கும் நன்றி தலைவா” என நெகிழ்ச்சியாக தெரிவித்துள்ளார்.

I’m extremely happy with the appreciation from Superstar @rajinikanth sir for #Amaran. Sitting with him as he admired every nuance of the film was truly unforgettable for me and the team. Thank you Thalaiva for your constant support and encouragement! 🙏❤️ pic.twitter.com/ZnVTRa2CfP

— Sivakarthikeyan (@Siva_Kartikeyan) November 2, 2024