50 கோடி டார்கெட்! ரீ-ரிலீஸ் ஆன கில்லி இப்போது வரை எவ்வளவு வசூல் தெரியுமா?

Ghilli Re Release : ரீ-ரிலீஸ் செய்யப்பட்ட கில்லி திரைப்படம் மக்களுக்கு மத்தியில் நல்ல வரவேற்பை பெற்று வரும் நிலையில், 25 கோடி வசூலை நெருங்கியுள்ளதாக தகவல்.

விஜயின் நடிப்பில் கடந்த 2004-ஆம் ஆண்டு வெளியாகி வசூலில் சக்கைபோடு போட்ட கில்லி திரைப்படம் ரசிகர்களுக்காக இந்த ஆண்டு கடந்த ஏப்ரல் 20-ஆம் தேதி மீண்டும் திரையரங்குகளில் ரீ-ரிலீஸ் செய்யபட்டது. ரீ -ரிலீஸ் செய்யப்பட்ட இந்த படத்தை இப்போது தான் புதிதாக வெளியான படம் என்பது போல ரசிகர்கள் கொண்டாடி வருகிறார்கள்.

விஜய் ரசிகர்கள் மட்டுமின்றி மக்கள் பலரும் குடும்பமாக சென்று படத்தை பார்த்து கண்டுகளித்து வருகிறார்கள். இப்படியான வரவேற்பு கிடைத்து வருவதால் வசூல் ரீதியாகவும் படத்திற்கு அமோக வரவேற்பு கிடைத்து வருவதாக சொல்லப்படுகிறது. ரீ-ரிலீஸ் செய்யப்பட்ட அந்த முதல் நாளிலே 4 கோடிகளுக்கு மேல் உலகம் முழுவதும் வசூல் செய்து ரீ-ரிலீஸ் செய்த படங்களில் அதிகம் வசூல் செய்த சாதனையை படைத்தது இருந்தது.

பாக்ஸ் ஆபிஸ் ஆய்வாளர்கள் கணக்குப்படி, கில்லி ரீ-ரிலீஸ் உலகம் முழுவதும் மொத்தமாக 50 கோடிகள் வரை வசூல் செய்ய வாய்ப்பு இருப்பதாக கணித்துள்ளார்கள். இதனையடுத்து, இதுவரை படம் வெளியானதில் இருந்து இப்போது வரை எவ்வளவு வசூல் செய்துள்ளது என்ற தகவல் கிடைத்துள்ளது.

அதன்படி, இதுவரை படம் 23 கோடி வசூல் செய்துள்ளதாம். சனி மற்றும் ஞாயிற்றுக்கிழமை இரண்டு தினங்களும் விடுமுறை நாட்கள் என்பதால் படத்தை பார்க்க மக்கள் கூட்டம் திரையரங்குகளில் அலைமோதுகிறது. எனவே, கண்டிப்பாக இன்று படத்தின் வசூல் 25 கோடிகளை கடந்துவிடும் எனவும் எதிர்பார்க்கப்படுகிறது.